İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 249 Hüküm no: 333 Orijinal metin no: [37a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hanefi b. İbrahim’in ölen eşi Sultan bt. İsmail’e ödünç para, nafaka ve mehir borcu Mahmiye-i İstanbul’da vâki‘ Kızıl minâre mahallesinde bundan akdem vefât eden Sultan bt. İsmail nâm hâtunun verâseti, li ebeveyn kız karındaşı Hani ve zevce-i metrûkesi Hanefi b. İbrahim’e münhasıra oldukdan sonra merkūme Hani meclis-i şer‘de, merkūm Hanefi mahzarında üzerine da‘vâ edip, müteveffât-ı mezbûrenin merkūm Hanefi zimmetinde karz-ı şer‘îden beş bin akçe ve mehr-i müeccelinden iki bin akçe hakkı olup ve mezbûre Sultan hayâtda iken merkūm Hanefi gaybet edip, merkūmeyi bilâ-nafaka terk etmekle, cânib-i şer‘den merkūm Hanefi üzerine yevmî beş akçe nafaka takrîr ettirmeğin, hâlâ merkūmun üzerinde iki yıl yedi aylık nafaka cem‘ olmuşdur. Verâsetim hasebiyle taleb ederim deyip, mahmiye-i merkūmede vâki‘ Sarâciye Mahkemesi’nde bin yirmi üç senesinde nâ’ibü’ş-şer‘ olan Abdurrahman b. Hüseyin imzâsıyla mümzât ve hâtemiyle mahtûme sene-i mezbûre Zilhiccesi’nin ikinci günü târihiyle müverraha, takrîrine muvâfık nafaka hücceti ibrâz ettikde, gıbbe’s-suâl merkūm Hanefi cevâbında, fi’l-vâki‘ zevcem müteveffât-ı mezbûrenin karz-ı şer‘îden beş bin akçe hakkı var idi. Lâkin hâl-i sıhhatinde meblağ-ı merkūmun üç bin akçesini merkūmeye îfâ eyledim, iki bin akçesi hâlâ zimmetimdedir ve mehr-i müecceli ancak bin akçedir deyip ve mazmûn-ı hücceti ikrâr edip, lâkin üzerimde cem‘ olan iki yıl yedi aylık nafakadan merkūme Hani’ye bin altı yüz akçesin edâ etdim deyicek, merkūme Hani nafaka için mezbûrenin vefâtından sonra merkūm Hanefi yedinden bin altı yüz akçe aldığını ikrâr edip, meblağ-ı mârrü’z-zikr beş bin akçenin üç bini müteveffât-ı merkūme hayâtında istîfâ ettiğini inkâr edicek, merkūm Hanefi’ye ikrârı mûcebince karz-ı şer‘îden zimmetinde bâkī kalan iki bin akçeyi ve nafakadan bâkī kalan meblağı edâya tenbîh olunup ve üç bin akçeyi edâ ettiğine beyyine taleb olundukda, ityân-ı beyyine için istimhâl etmeğin, mehl-i şer‘î verildikden sonra, merkūme Hani’den dahi müteveffât-ı mezbûrenin mehr-i bin akçeden ziyâde idiğine beyyine taleb olundukda, mezbûre dahi kezâlik istimhâl etmeğin, mehl-i şer‘î verilip, mâ vaka‘a bi’t-taleb ketb olundu. Hurrire fi’l-yevmi’l-hâmis aşer min Rebî‘ilâhir li sene seb‘a ve ışrîn ve elf. Şuhûd[ü’l-hâl]: Murad b. Mehmed, Mehmed b. Ahmed, Musa b. İlyas, Mehmed b. Eyüb Mirahor ve gayruhüm.