İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 262 Hüküm no: 355 Orijinal metin no: [39b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’e babasından intikâl eden, Râbia Hâtun bt. Hasan Ağa’daki emânet paranın alınması Mahmiye-i İstanbul’da Korucu? Mahmud mahallesi sâkinelerinden Fâtıma bt. Mehmed nâm sagīrenin vâlidesi ve ta‘dîl-i umûriçin kıbel-i şer‘den mansûb vasîsi olan Ayşe Hâtun bt. Ahmed meclis-i şer‘-i şerîfde, fahrü’l-muhadderât Râbia Hâtun bt. el-merhûm Hasan Ağa tarafından husûs-ı âti’z-zikre vekîl olup, nehc-i şer‘î-i mu‘teber üzre şer‘an vekâleti sâbite olan zevci fahrü’l-a‘yân Ahmed Subaşı b. Ramazan mahzarında takrîr-i kelâm edip, bundan akdem merhûm-ı mersûm Hasan Ağa’da kızım sagīre-i mezbûreye babasından intikāl eden emvâlinden kırk bin nakid akçe emânet vaz‘ etmiş idi. Mezbûr Hasan Ağa bi emrillâhi te‘âlâ vefât ettikde meblağ-ı merkūmu kızı mesfûre Râbia Hâtun hıfz etmişdi. Hâlâ meblağ-ı mezbûr kırk bin akçeyi vekîl-i mezbûr Ahmed Subaşı yedinden bi’t-tamâm ahz u kabz eyledim, meblağ-ı mezbûrdan merkūme Râbia Hâtun yedinde bir akçe ve bir habbe bâkī kalmadı dedikde, mukırr-ı mezbûre Ayşe Hâtun’u ikrâr-ı meşrûhunda mezkûr Ahmed Subaşı bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Fahrü’l-akrân Çâker Çavuş b. Abdullah, Abdi Çelebi [b.] eş-Şeyh Salim, Habib b. Hasan, Mehmed b. Behrâm, Mehmed b. Nebi, Mustafa b. Cafer, Mustafa b. Hamza.