İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 266 Hüküm no: 362 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Bâli’nin Fâtıma Hâtun bt. Mehmed’den istediği Rus asıllı köle ve câriyenin Fâtıma Hâtun’un mülkü olduğu Mahmiye-i İstanbul’da Hâfız Ahmed Paşa Câmi‘i mahallesi sâkinelerinden Ayşe Hâtun bt. Bâli Efendi tarafından husûs-ı âti’z-zikre vekîl olup, hasm-ı şer‘î-i câhid mahzarında Hasan Dede b. Abdullah ve Mahmud b. Veli şehâdetleri ile şer‘an vekâleti sâbite olan zevci Hasan Efendi b. Hüseyin meclis-i şer‘-i şerîfde, hâfızatü’-kitâb Fâtıma Hâtun bt. Mehmed mahzarında takrîr-i kelâm edip, müvekkilemin babası olup mezbûre Fâtıma Hâtun’un zevci olup bundan akdem vefât eden Bâli Efendi’nin verâseti zevcesi ile mezbûreye münhasıra olup ve müteveffâ-yı mezbûrun emvâlinden Rûsiyyü’l-asl Haver b. Abdullah nâm abd ve Rûsiyyetü’l-asl Kâmile bt. Abdullah nâm câriyeyi mezbûre Fâtıma Hâtun zabt ve tasarruf eder, suâl olunup müvekkilimin hisse-i şer‘iyyesi alıverilmek taleb ederim dedikde, gıbbe’s-suâl mezbûre Fâtıma Hâtun cevâbında, zikr olunan abd ile câriye müteveffâ-yı mezbûrun emvâlinden değildir, benim mülk-i müşterâmdır deyicek, vekîl-i merkūmdan takrîrine muvâfık beyyine taleb olundukda, ityân-ı beyyineden âciz olup, mezkûre Fâtıma Hâtun abd-i mezkûr ve câriye-i mezbûre müteveffâ-yı mezbûr emvâlinden olup ikisine intikāl etmediğine yemîn teklîf olundukda, ol dahi yemîn billâhi te‘âlâ etmeğin, mâ hüve’l-vâki‘ gıbbe’t-taleb ketb olundu. Hurrire fî selhi Cemâziyelevvel li sene seb‘a ve ışrîn ve elf. Şuhûd[ü’l-hâl]: Mustafa b. Abdullah, Murad b. Mehmed, Mustafa b. Cafer, Mehmed b. Cafer ve gayruhüm.