İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 267 Hüküm no: 365 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Süleyman’ın ortak kullandıkları duvar üzerine Ahmed Ağa’nın bina yapmasına izin verdiği Husûs-ı âti’z-zikri mahallinde ketb ü tahrîre savb-ı şer‘-i kavîmden adam taleb olundukda, fahrü’l-mülâzım Mevlânâ Mahmud Efendi irsâl olunup, hâssa mi‘mârlarından Ali Bey b. Abdullah ve zeyl-i kitâbda mastûrü’l-esâmi olan cemm-i gafîr Müslimîn ile mahmiye-i İstanbul’da Hasan Çelebi mahallesi sâkinlerinden olup İstanbul Ağası olan fahrü’l-a‘yân Ahmed Ağa b. Mahmud’un menziline varıp akd-i meclis edip, mezbûr Ahmed Ağa’nın câr-ı mülâsıkı olan Ayşe Hâtun bt. Süleyman hâzıra bi’l-meclis olup muvâcehesinde ikrâr ve takrîr-i merâm edip, benim mülk menzilimin cânib-i şarkīsinde vâki‘ mezbûr Ahmed Ağa’nın cânib-i şarkīsinde vâki‘ olup tûlen ve arzan hesâb-ı şatrancî üzre doksan zirâ‘ olan duvar beynimizde müşterek olup, benim menzilimden tarafı benim mülküm, mezbûr Ahmed Ağa menzilinden tarafı kendinin mülkü iken hâlâ mezbûr Ahmed Ağa zikr olunan duvarın üzerine mertekler vaz‘ edip üstüne binâ ihdâs etmek murâd eder deyû mezbûr Ahmed Ağa’dan taleb ve da‘vâ edip, mi‘mâr-ı mezbûr sâir ahâlî-i vukūf dahi zikr olunan duvar vech-i sâbık üzre müşterek idiğin haber vermekle beynimizde münâza‘ât-ı kesîre vâkı‘a olmuşidi. El-hâletü hâzihî tavassut-ı Müslimîn ile ben zikr olunan duvarın üzerine mertek vaz‘ edip binâ ihdâsına mezbûr Ahmed Ağa’ya izin verip, mezbûr dahi mukābelesinde bana üç bin akçe vermek üzre sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı merkūmu mezbûr Ahmed Ağa yedinden alıp kabz edip, vech-i merkūm üzre duvar-ı mezbûra mertek vaz‘ edip binâya izin verdim dedikde, mezbûr Ayşe Hâtun’u cemî‘-i kelimâtında mezbûr Ahmed Ağa bi’l-muvâcehe tasdîk eylediğin mevlânâ-yı mersûm mahallinde tahrîr edip, ba‘dehû gelip mahfil-i kazâda inhâ ve takrîr etmeğin, mâ vaka‘a bi’t-taleb ketb ü tahrîr olundu. Tahrîren fî evâsıtı Cemâziyelevvel li sene 1027. Şuhûd[ü’l-hâl]: Hasan Subaşı b. Mehmed, İbrahim Subaşı b. Abdullah, Mehmed Subaşı b. Mahmud, Osman Halîfe b. Ömer el-imâm, Receb b. Abdullah, Ali Bey b. Sefer, Ali Beşe b. Abdullah ve gayruhüm.