İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 270 Hüküm no: 370 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Dimitri Moskolyo’nun diğer Dimitri Mosko’ya verdiği ödünç miktarında anlaştıkları Mahmiye-i İstanbul’da Tavukpazarı bakkallarından Dimitri Moskolyo nâm zimmî meclis-i şer‘-i kavîmde işbu hâfız[-ı kitâb] diğer Dimitri v. Moskoya nâm zimmî muvâcehesinde ikrâr ve ta‘bîr ani’l-merâm edip, bundan akdem ben sılama gittiğimde sermâye tarîkiyle merkūm Dimitri’ye elli bin akçe verip, ba‘dehû sılamdan geldiğimde meblağ-ı mezbûr elli bin akçeden yirmi bin akçe noksan geldi deyû beynimizde münâza‘ât-ı kesîre ve muhâsamât-ı şedîde vâkı‘a olmuşidi. El-hâletü hâzihî tavassut-ı muslihîn ile husûs-ı mezbûru an inkâr iki bin sekiz yüz akçeye sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı merkūm iki bin sekiz akçeyi bi’t-tamâm merkūm Dimitri yedinden ahz u kabz edip, zimmetini husûs-ı mezbûre müte‘allik olan cemî‘-i da‘âvî ve mütâlebât ve eymân ve muhâsemâtdan ibrâ-i âm ile ibrâ ve ıskāt-ı hak eyledim. Ba‘de’l-yevm mazmûn-ı kitâba muhâlif benden veya vekîlimden da‘vâ sâdıre olursa, lede’l-hükkâmi’l-kirâm mesmû‘a ve makbûle olmaya dedikde, mukırr-ı mezbûrun vech-i meşrûh üzre ikrârını merkūm Dimitri bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb ve terkīm olunup yed-i tâlibine def‘ olundu. Tahrîren fî selhi Cemâziyelevvel li sene seb‘a ve ışrîn ve elf. Şuhûd[ü’l-hâl]: İsmail b. Abdünnebî, Mustafa b. Hamza, Hasan b. Ali, Ramazan b. Mehmed, Murad b. Halil, el-Hâc Kadri b. İlyas ve gayruhüm.