İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 286 Hüküm no: 394 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Paşa’nın, kardeşi Mehmed Çavuş’dan satın aldığı arazi ve mallarının vekîline teslim edilmesi Sâbıkan vezâretle Bosna Beylerbeyi olup, ber vech-i arpalık Kastamonu sancağından munfasıl olan düstûr-ı mükerrem müşîr-i müfahham nâzım-ı menâzımü’l-âlem küberâ’i’s-sâ’ib mütemmim-i mehâmmü’l-enâm bi’l-fikri’s-sâkıb Mustafa Paşa hazretleri tarafından, husûs-ı âti’z-zikre hasm-ı şer‘î-i câhid mahzarında Derviş b. Haydar ve Yusuf b. Abdullah şehâdetleri ile vekâlet-i sâbite olan fahrü’l-akrân Hasan Ağa b. Hasan meclis-i şer‘-i şerîf-i şâmihü’l-imâdda vezîr-i müşârun-ileyhin li ebeveyn karındaşı olup, bundan esbak fevt olan Mehmed Çavuş b. Süleyman’ın sagīr oğulları Ahmed ve Dilaver’in kıbel-i şer‘-i şerîfde mansûb vasîleri olup, emlâk ve arâzî [ve] ebniyeye vâzı‘u’l-yed olduğu şer‘an sâbit olan Mustafa Efendi b. Abdullah mahzarında vekâleten takrîr-i da‘vâ edip, Gelibolu kazâsına tâbi‘ Kavaklı nâm karyede vâki‘ iki fevkānî ve bir tahtânî evleri ve bir anbarı ve bir ahırı müştemil olup, bir tarafı Seydî Bâli b. ( ) mülkü ile ve üç tarafı tarîk-i âm ile mahdûd olan mülk menzili ve bir su sığırı çiftini ve bir kara sığırı çiftini ve iki su sığırı ineğini ve bir su sığırı düğesini ve bir su sığırı tosunu ve bir kara sığır tosunu ve bir bârgiri ve Macarü’l-asl Sadr b. Abdullah nâm kulu ve iki kıt‘a bağı müvekkil-i mûmâ-ileyh safka-i vâhide ile otuz sekiz bin nakd-i râyic fi’l-vakt akçeye iştirâ ve teslîm-i semen-i mesfûr ve kabz-ı cemî‘-i mebî‘-i mezkûr edip ve yine karye-i mezbûrede vâki‘ inde’l-ahâlî ve’l-cîrân ma‘lûmü’l-hudûd olan kıt‘a mezâri‘i sâhib-i arz ma‘rifetiyle tefvîz edip, mu‘âmele-i tefvîzde merkūm on bin nakd-i râyic fi’l-vakt akçe teslîm edip, emlâk-i mezbûre ve arâzî-yi mesfûre vezîr-i müşârun-ileyhin müşterâsı iken vasî-yi mezkûr fuzûlen vaz‘-ı yed etmişdir. Suâl olunup yedi [yed-i] kasr olunmak matlûbumdur dedikde, gıbbe’s-suâl yetîmân-ı mezbûrânın mülkü olduğu sebebden vaz‘-ı yed ettiğin ikrâr edip, vezîr-i müşârun-ileyhin mülkü olduğun inkâr edip, vekîl-i mezbûrdan da‘vâsını müsbite beyyine taleb olundukda, udûl-i Müslimînden Ahmed Çelebi b. Mustafa ve Mehmed Çelebi b. Mehmed ve Ahmed Bey b. Nasûh nâm kimesneler meclis-i şer‘-i şerîfe hâzırûn olup, fi’l-vâki‘ hudûd-ı mezbûre ile mahdûde olan emlâk ve arâzîyi müvekkil-i mûmâ-ileyh mezbûrdan otuz sekiz bin akçeye iştirâ ve on bin akçeye tefevvüz etti. Müvekkil-i mûmâ-ileyhin mülk-i müşterâsıdır. Bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri hayyiz-i kabûlde vâki‘ oldukda, mûcebi ile tenbîh birle, mâ vaka‘a ketb olundu. Tahrîren fi’l-yevmi’r-râbi‘ min Cemâziyelâhir min şuhûri li sene seb‘a ve ışrîn ve elf. Şuhûd[ü’l-hâl]: Süleyman Çelebi b. Ali, Hamza b. Mustafa, Mustafa Çavuş-ı Dergâh-ı âlî, Sefer Çavuş-ı Dergâh-ı âlî, Arslan Çavuş, Mehmed Bey el-mütevellî, Mustafa Ağa, Mustafa Çelebi.