İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 290 Hüküm no: 402 Orijinal metin no: [45b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. eş-Şeyh Mehmed b. Ahmed Efendi’nin Yusuf b. Abdullah’a ödünç para verdiği Vilâyet-i Rumeli’nde kasaba-i Üsküb sâkinlerinden eş-Şeyh Mehmed b. Ahmed Efendi meclis-i şer‘-i şerîfde Yusuf b. Abdullah nâm kimesne muvâcehesinde üzerine da‘vâ edip, bundan akdem mahmiye-i İstanbul’da mezbûr Yusuf’a karz tarîkiyle yirmi üç aded filori ve beş aded guruş ve elli nakid akçe ve kasaba-i mezbûrede dört yüz akçe, cem‘an dört bin sekiz yüz doksan akçe karz verdim, ikrâr dahi etmişdir. Hâlâ edâdan ta‘allül eder, suâl olunup mûcebini taleb ederiz dedikde, gıbbe’s-suâl ve akībü’l-inkâr müdde‘î-i mezbûr eş-Şeyh Mehmed’in sıdk-ı da‘vâsına beyyine taleb olundukda, udûl-i ahrârdan Mahmud Efendi b. Mehmed ve Hüseyin b. Mustafa nâm kimesneler li ecli’ş-şehâde hâzırân bi’l-meclis olup, istişhâd olunduklarında, fi’l-vâki‘ vech-i muharrer üzre bundan akdem mezbûr Yusuf mahalle-i mezbûreden merkūm eş-Şeyh Mehmed’den karz tarîki ile yirmi üç aded filori ve beş aded guruş ve elli akçe ve kasaba-i mezbûrede dört yüz akçe, cem‘an dört bin sekiz yüz doksan [akçe] aldım deyû ikrâr etti, bu husûsa şâhidleriz, şehâdet dahi ederiz deyû edâ-i şehâdet-i şer‘î ettiklerinde, gıbbe’t-ta‘dîl şehâdetleri hayyiz-i kabûlde vâki‘ olup, mûcebince hükm birle, mâ cerâ bi’t-taleb kayd olundu. Şuhûdü’l-mezbûr: Mehmed b. ( ) [el-]müezzin?, Hasan b. Ahmed, Halil [b.] İbrahim ve gayruhüm.