İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 301 Hüküm no: 421 Orijinal metin no: [48a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Mustafa’nın, Hasan Çelebi b. Sinan’daki alacağının ödenmesi Mahmiye-i Kostantıniyye mahallâtından Dülgerzâde mahallesi sâkinelerinden işbu sâhibetü’l-kitâb Ayşe Hâtun bt. Mustafa meclis-i şer‘de Hasan b. Sinan mahzarında üzerine takrîr-i da‘vâ edip, mezbûr Hasan Çelebi zimmetinde karz-ı şer‘îden on bin akçe hakkım olup, mukaddemâ mezbûr Hasan ikrâr dahi edip, hâlâ meblağ-ı mezkûr on bin akçenin dört bin akçesin yedinden alıp kabz edip bâkī olan altı bin akçenin alıverilmesin murâd ederim dedikde, gıbbe’s-suâl mezbûr Hasan Çelebi cevâbında, fi’l-vâki‘ müdde‘iyye-i mezbûreye karzdan olan dört bin akçe deynini edâ ettiğini ikrâr, mâ‘adâsın bi’l-külliye inkâr edip, müdde‘iyye-i mezbûreden da‘vâsını müsbite beyyine taleb olundukda, udûl-i Müslimînden Ali Çavuş b. Kemal ve Hüseyin Bey b. Abdullah el-cündî nâm kimesneler gıbbe’l-istişhâd, meclis-i şer‘a li ecli’ş-şehâde hâzırân olup, fi’l-vâki‘ merkūm Hasan Çelebi bizim huzûrumuzda müdde‘iyye-i mezbûreye karz-ı şer‘îden on bin akçe deynim vardır deyû ikrâr etti, bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, isre’t-ta‘dîl ve’t-tezkiye şehâdetleri hayyiz-i kabûlde vâkı‘a oldukda, meblağ-ı mezbûr altı bin akçenin edâ ve teslîm ile mezbûr Hasan Çelebi’ye tenbîh olunup, mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Cemâziyelâhir li sene seb‘a ve ışrîn ve elf. Şuhûdü’l-hâl: El-Hâc Mehmed b. İsmail, İbrahim b. Receb, Mehmed b. Durmuş, Hamza b. Mustafa, Murad b. Mehmed.