İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 302 Hüküm no: 424 Orijinal metin no: [48b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah ve David v. Köni’nin bağlarını Osman b. Mehmed’e sattıkları Rumeli’nde Opar kazâsına tâbi‘ Rosova nâm karye sükkânından Mehmed Beşe b. Abdullah er-râcil ve David v. Köni nâm kimesneler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda, işbu hâfizu’l-kitâb Osman b. Mehmed nâm kimesne mahzarında ikrâr ve ta‘bîr ani’l-merâm [edip], karye-i mezbûrede vâki‘ bir tarafdan Derviş Bey b. Sefer mülküne ve bir tarafdan Mehmed b. Abdullah bağına ve bir tarafdan dereye ve bir tarafdan tarîk-i âm[a] müntehî olan tahmînen otuz çapalık bağımızı, mezbûr Osman’a üç bin beş yüz nakd-i râyic fi’l-vakt akçeye bey‘-i kat‘î ile bey‘ edip, semeni olan meblağ-ı merkūmu mezbûr Osman yedinden bi’t-tamâm ahz u kabz ettikden sonra zikr olunan bağı mahallinde kabza mezbûr Osman’ı taslît eyledik dediklerinde, mukırrân-ı mezbûrânın vech-i meşrûh üzre ikrârın merkūm Osman bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ gıbbe’t-taleb ketb ve imlâ olunup yedine def‘ olundu ki, vakt-i hâcetde müzekkeri mâ cerâ ola. Tahrîren fi’l-yevmi’s-sâmin aşer min Cemâziyelâhir min şuhûri li sene seb‘a ve ışrîn ve elf. Şuhûdü’l-hâl: Ali Beşe b. Mehmed er-râcil, Âbidin b. Hızır er-râcil, Mehmed b. Hasan, Hasan b. Ahmed, Hasan Çelebi b. Ali, Mahmud b. Abdullah.