İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 303 Hüküm no: 426 Orijinal metin no: [48b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Halil ve Beşir b. Mustafa’nın zimmetlerini ibrâ ettikleri ve muhâla‘a yoluyla boşandıkları Mahmiye-i İstanbul’da Mirahor mahallesinde sâkine Ayşe bt. Halil mahfil-i kazâda zevci hâmilü’l-kitâb Beşir b. Mustafa tarafından ikrâr-ı âti’z-zikri tasdîka vekîl olup, Mustafa b. Abdüssamed ve Perviz b. Abdullah şehâdetleri ile mahzar-ı hasm-ı câhidde vekâleti sâbite olan babası mezbûr Mustafa b. Abdi muvâcehesinde ikrâr ve takrîr-i kelâm edip, zevcim mezbûr Beşir’in zimmetinde olan bin akçe mehr-i müeccelimin altı yüz akçesin alıp kabz edip, mâ‘adâsı dört yüz akçeden ve nafaka-i iddetimden ve beynimizde vasıfları ma‘lûm iki mülk döşek ve iki yasdık ve iki yorgandan fâriğa olmak üzre mezbûr Beşir ile muhâla‘a eylediğimizden sonra zevciyyete müte‘allika de‘âvî ve husûmâtdan biri birimizin zimmetin ibrâ ve ıskāt ettik dedikde, mezbûre Ayşe Hâtun’u ikrâr-ı meşrûhunda mezbûr Mustafa dahi vekâlet-i mahkiyesi hasebi ile vicâhen tasdîk ve vech-i sâbık üzre müvekkil-i mezbûre Ayşe ile muhâla‘a edip, zevciyyete müte‘allika de‘âvî ve husûmâtdan ahadühümâ âharın zimmetin ibrâ ve ıskāt eylediklerin tahkīk etmeğin, mâ vaka‘a gıbbe’t-taleb ketb ü tahrîr olundu. Tahrîren fi’l-yevmi’s-sâbi‘ aşer min Cemâziyelâhir li sene 1027. Şuhûdü’l-hâl: Mehmed b. Bâli, Halil b. el-Hâc İbrahim, el-Hâc Ali b. Mustafa, el-Hâc Hüseyin b. Osman, Mehmed b. Eyüb, Hüseyin b. Mustafa eş-şehîr bi Üskübî, Süleyman Efendi el-kâtib ve gayruhüm.