İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 310 Hüküm no: 439 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Totos v. Dimo’nun, Belgrâdî Mustafa Efendi Vakfı’na borcu olduğu Zimmî tâ’ifesinden Totos v. Dimo meclis-i şer‘-i kavîmde mahmiye-i Kostantıniyye’de Belgrâdî merhûm Mustafa Efendi vakfında berât-ı pâdişâhî ile işbu bi’l-fi‘il mütevellî olan bâ‘is-i hâze’l-kitâb Mehmed Çelebi b. Hasan muvâcehesinde ikrâr ve i‘tirâf edip, mütevellî-i mezbûr yediyle mâl-ı vakf-ı merkūmdan me’hûz yirmi beş bin akçe asıldan ve altı bin akçe bir gümüşlü raht semen ve bahâsından cem‘an zimmetimde edâsı lâzım otuz bir bin akçe deynim vardır dedikde, mukırr-ı mezbûr zimmîyi vech-i muharrer üzre sâdır olan ikrârında el-mukarru lehü’l-mezbûr Mehmed Çelebi vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb ve yed-i tâlibe vaz‘ olundu. Tahrîren fî evâsıtı Cemâziyelâhir li sene seb‘a ve ışrîn ve elf. Şuhûdü’l-hâl: İbrahim b. Receb, Mustafa b. Hamza, Ahmed b. Hamza, Mehmed b. Kadri, Nasûh b. el-Hâc Osman, Memi b. Abdullah ve gayruhüm mine’l-huzzâr.