İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 311 Hüküm no: 441 Orijinal metin no: [50a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul metropolidi Timotyos’un alacak davası için Mustafa Çelebi b. Mehmed’i vekil tayin ettiği Mahmiye-i Kostantıniyye ve memâlik-i mahrûsede olan nasârâ tâ’ifesine bi’l-fi‘il metropolid olan Timotyos nâm râhib mahfil-i kazâda Mustafa Çelebi b. Mehmed mahzarında takrîr-i kelâm edip, Dülbentçi Mehmed Ağa, sen Papa Nikola nâm hâlikin muhallefâtını kabz ettin, benim mersûm Papa Nikola’da beş yüz filori hakkım vardır deyû benden da‘vâ edip, el-hâletü hâzihî merkūm Mehmed Ağa ve vekîl[ine] da‘vâ ve husûmete ve redd-i cevâba mersûm Mustafa Çelebi’yi vekîl ve menâbıma nâ’ib nasb eyledim dedikde, ol dahi vekâlet-i merkūmeyi kabûl ve hizmet-i lâzımesine müte‘ahhid olmağın [bi’t-taleb ketb olundu]. [Tarih yazılmamıştır]. Şuhûdü’l-hâl: Hamdi Çelebi el-müderris el-kâtib, Ahmed Efendi el-kadı el-kâtib, Receb Efendi el-kadı el-kâtib, Murad b. Mehmed, Ahmed b. Hamza.