İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 314 Hüküm no: 447 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen köle Belkıs bt. Abdullah’ın âzâd olunduğunu ispat ettiği Bundan akdem vefât eden Sultan bt. İsmail’in zevci Hanefi b. İbrahim meclis-i şer‘de, mezbûrenin mu‘takası olan işbu râfi‘atü’l-kitâb uzun boylu kara gözlü Rûsiyyetü’l-asl Belkıs bt. Abdullah mahzarında üzerine takrîr-i da‘vâ edip, mezbûre Belkıs mezbûre Hâtunun mülkü olup vefât ettikde verâseti bana ve li ebeveyn kız karındaşı Cevrî nâm hâtuna munhasıra olmağın, merkūme Belkıs’ın dahi nısfı bana intikāl edip mülk-i mevrûsum olmuş iken itâ‘atden imtinâ‘ eder, suâl olunup ihkāk-ı hak olunmasın taleb ederim dedikde, gıbbe’s-suâl mezbûre Belkıs cevâbında, fi’l-vâki‘ mezbûre Sultan Hâtun’un câriyesi olup hâl-i hayâtında beni müdebbere edip vefât ettikde müdde‘î-i mezbûr gāib ve mezbûre Hâtunun verâseti henüz meşkûke ve gayr-i müsbete olduğuna binâen, mahmiye-i İstanbul’da Beytü’l-mâl emîni olan Mehmed Ağa mezbûre Hâtunun mülkü olmak zu‘mu ile bana emâneten ve kıbel-i şer‘den vesâyeten vaz‘-ı yed edip, ben dahi hayâtında mezbûre Hâtun müdebbire idiğini mahmiye-i mezbûrede bin yirmi altı senesi Cemâziyelevveli’nin evâ’ilinde kassâm-ı askerî olan Mevlânâ Mehmed Efendi b. Ali huzûrunda nehc-i şer‘î üzre isbât ve ıtkıma hükm edip, yedime hüccet-i şer‘iyye verdi deyû kassâm-ı mûmâ-ileyh imzâsıyla mümzât ve hâtemiyle mahtûme hüccet ibrâz edip, hüccet-i merkūme cevâbına muvâfık bulundukda, gıbbe’l-istintâk merkūm Hanefi mazmûn-ı hücceti inkâr edip, mezbûre Belkıs’dan sıdk-ı makāline beyyine taleb olundukda, udûleyn zeyl-i kitâbda mastûrü’l-e[sâ]mî olan Müslimînden Ahmed Çelebi b. Mehmed ve Mehmed b. Hamza nâm kimesneler meclis-i şer‘a hâzırân olup gıbbe’l-istişhâd, fi’l-vâki‘ emîn-i mezbûr müteveffât-ı mezbûrenin mülkü olmak zu‘mu ile isbât ve ıtkına hükm olundu, bu husûsa şâhidleriz, şehâdet dahi ederiz deyû mazmûn-ı hüccet-i mezbûreye muvâfık edâ-i şehâdet-i şer‘iyye ettiklerinde şehâdetleri hayyiz-i kabûlde vâkı‘a olmağın, hâlâ vereseye nazaran müteveffât-ı mezbûrenin zât-ı tezkiyesi merkūmenin zımnında müsâ‘id idiği sikāt ihbârıyla ma‘lûm olmağın, hükm-i sâbık îfâ olunup, mâ hüve’l-vâki‘ bi’t-taleb ketb olundu. Hurrire fî evâhiri Cemâziyelâhir li sene seb‘a ve ışrîn ve elf. Şuhûdü’l-hâl: İbrahim [b.] Hanefi, Ali Çavuş el-mübâşir, Ahmed [b.] Ali, Mehmed [b.] Mustafa, Haydar b. Abdullah.