İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 319 Hüküm no: 456 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Handan Bey b. Abdullah’ın eşyalarını çalan Ahmed b. Ali’nin eşyaları Zülfikar b. Abdullah’a teslim etmesi Sâbıkan Karaman Beylerbeyi olan emîrü’l-ümerâ’i’l-kirâm kebîrü’l-küberâ’i’l-fihâm Yahya Paşa hazretlerinin âdemlerinden olan fahrü’l-akrân Handan Bey b. Abdullah meclis-i şer‘-i şerîfde, sarrâclar tâ’ifesinden Üstâd Zülfikar b. Abdullah muvâcehesinde üzerine da‘vâ kılıp, işbu hâzır bi’l-meclis olan Ahmed b. Ali nâm mürâhık, bundan akdem mezbûr Zülfikar’ın şâkirdi iken benim yanıma gelip üç yıl hizmetkârım oldukdan sonra, hâlâ odamdan sekiz yüz elli akçe kıymetli bir sahan ve dört yüz akçemi ve üç makramamı ahz edip, ba‘dehû mezbûr Zülfikar’ın yanına gelip, zikr olunan şeyler merkūm Zülfikar’a teslîm etmiş, suâl olunup alıverilmesin taleb ederim dedikde, mezbûr gıbbe’s-suâl ve akībü’l-inkâr, müdde‘î-i mezbûr Handan Bey’in sıdk-ı da‘vâsına beyyine taleb olundukda ityânından âciz olup istihlâf etmeğin, mezbûr Zülfikar’a vech-i muharrer üzre merkūm Ahmed zikr olunan şeyleri kendüye teslîm etmediğine yemîn teklîf olundukda, mezbûr Zülfikar yemînden nükûl etmeğin, mâ hüve’l-vâki‘ gıbbe’t-taleb ketb olundu. Tahrîren fî evâhiri Cemâziyelâhir li sene seb‘a ve ışrîn ve elf. Şuhûdü’l-hâl: Yusuf [b.] Abdullah, Hüseyin Beşe er-râcil, Rıdvan [b.] Abdullah, Musli [b.] Hızır, İshak [b.] Veli, Mehmed [b.] Timur, Ahmed [b.] Veli ve gayruhüm.