İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 354 Hüküm no: 517 Orijinal metin no: [59b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muharrem ve Ahmed’in ortaklığı fesh ederek zimmetlerini ibrâ ettikleri Sâbıkan vilâyet-i Anadolu’da kasaba-i Çorum sâkinlerinden olup, hâlâ mahmiye-i İstanbul’da Ortakapısı dâhilinde sâkin Muharrem b. Müstecâb meclis-i kazâda li ebeveyn karındaşı, işbu râfi‘ü’l-kitâb Ahmed b. Müstecâb el-mezbûr mahzarında ikrâr ve takrîr-i kelâm edip, bundan akdem karındaşım mezbûr Ahmed ile şirket-i sanâyi‘ tarîkiyle şirket edip, mezbûr ile papuççuluk san‘atı işleyip, hâlâ muhâsebemiz gördüğümüzde, benim mezbûr Ahmed zimmetinde mâl-ı şirketden sekiz yüz akçe hakkım zuhûr edip, mezbûr Ahmed’den meblağ-ı merkūmu bana teslîm edip, ben dahi kabz ve tesellüm edip, beynimizde cârî olan akd-i şirketi fesh edip, zikr olunan şirkete müte‘allik de‘âvî ve husûmâtdan biri birimizin zimmetin ibrâ-yı âm ile ibrâ ve terk-i da‘vâ ettik dedikde, mezbûr Muharrem’i ikrâr-ı meşrûhunda karındaşı mezbûr Ahmed dahi vicâhen ve şifâhen tasdîk ve beynlerinde cârî olan akd-i şirketi vech-i sâbık üzre fesh edip kendi dahi mezbûrun zikr olunan şirkete müte‘allik da‘âvâdan ve husûmâtdan zimmetini ibrâ ve terk-i da‘vâ eylediğin tahkīk etmeğin, mâ vaka‘a bi’t-taleb ketb ve yed-i tâlibe def‘ olundu. Hurrire fî 10 Recebi’l-ferd li sene 1027. Şuhûdü’l-hâl: Mehmed b. Pir Ali, Hamza b. Ali, İshak b. Veli, Abdurrahman b. Süleyman ve gayruhüm mine’l-hâzırîn