İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 375 Hüküm no: 556 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köse Duka v. Todori’nin el koyduğu çiftlik hissesini Andon v. Dimitri’ye teslimi Zimmî tâ’ifesinden işbu râfi‘ü’l-kitâb Andon v. Dimitri nâm zimmî mahfil-i kazâda, bundan akdem mahrûse-i Galata’da hâlike olan ve Vitorye bt. Yani nâm zimmîyenin hâli ve bi’l-inhisâr vârisi olup, akārâti’l-mezkûre vâzı‘u’l-yed idiği şer‘an sâbit olan Köse Duka v. Todori nâm zimmî mahzarında üzerine takrîr-i da‘vâ edip, hâlike-i mezbûre hâl-i sıhhatinde vilâyet-i Anadolu’da Samanlı kazâsına tâbi‘ Katırlı nâm karye kurbunda vâki‘ bir tarafı Mustafa Çelebi b. Hüseyin mülkü ve bir tarafdan Şiyona v. Nikola nâm zimmî mülkü ve bir tarafı cebel ve bir tarafdan tarîk-i âm ile mahdûd olup, iki bâb tahtânî ve üç fevkānî büyûtu ve bir fırını ve bir hamamı ve iki ahırı ve bir güvercinliği ve iki göz su değirmeni ve yirmi dönüm bağı ve bir mikdâr arsa-i hâliyeyi müştemil olan mülk çiftlik menzilinin nısfını bin yirmi dört Cumâdelâhiresinin evâilinde iki bin nakd akçeye bey‘-i bât ile bey‘ ve teslîm ve kabz-ı semen etmiş iken, ba‘de helâkihâ mezbûr Köse Duka verâseti hasebiyle çiftlik-i mezkûrûn cümlesine vaz‘-ı yed edip, benim hâlik-i merkūmeden iştirâ ettiğimi inkâr etdikde, ben dahi da‘vâ edip, hâlike-i mesfûreden târih-i mezbûrda çiftlik-i mezbûrenin nısfını minvâl-i muharrer üzre bana bey‘ ettiğini bin yirmi altı senesi Rebî‘ilâhiri’nde mahrûse-i Galata’da kadı olan kıdvetü’l-ulemâ’i’l-izâm Hasan Efendi b. Şaban huzûrunda masfûr Köse Duka muvâcehesinde şer‘an isbât edip, çiftlik-i mezbûrun nısfı bi hasebi’ş-şer‘i’ş-şerîfe benim mülk-i müşterâm idiği muhakkak oldukdan sonra, mersûm Köse Duka dahi nısf-ı çiftlikde alâka ve medhalim yokdur, keyfe mâ yeşâ mutasarrıf olsun olsun deyû yedime hüccet-i şer‘iyye dahi vermiş iken, yine kanâ‘at etmeyip, çiftlik-i mezbûrun cümlesini tasarruf eder. Suâl olunup nısfından yed-i âdiyesi kasr olunmak taleb ederim deyû, mûmâ-ileyh efendinin imzâsıyla mümzât ve hâtemi ile mahtûme ve târih-i mezbûr ile muvarraha hüccet-i şer‘iyye ibrâz edip, nazar olundukda mazmûnu takrîrine muvâfık bulunmağın, merkūm Köse Duka istintâk olundukda, mazmûn-ı hüccet-i mezbûreyi mu‘terif olmağın, çiftlik-i mezbûrun nısfından kasr etmeğe mezbûr Köse Duka’ya tenbîh-i şer‘î kılınıp, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâmin aşer min Recebi’l-ferd li sene seb‘a ve ışrîn ve elf.Şuhûdü’l-hâl: Mustafa b. Cafer, Mustafa Ağa b. Abdullah, el-Hâc Ali b. Abdullah, Ali Beşe b. Veli el-bostanî, Çukadâr Ali b. Abdullah, Osman Bâşe b. Bayezid el-bostanî?, (…) ve gayruhüm.