İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 378 Hüküm no: 560 Orijinal metin no: [65a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Abdullah’ın ölümünde eşinin karnındaki çocuğu için ayrılan mîrâsın teslim edildiği Mahmiye-i İstanbul’da el-Hâc Muhyiddin mahallesinde vefât eden Mahmud b. Abdullah’ın verâseti sulbî sagīr oğulları Mehmed ve Mustafa’ya ve zevcesi Belkıs Hâtun bt. Ali’ye münhasıra idiği zâhir ve müte‘ayyin oldukdan sonra, mezbûre Belkıs Hâtun’un vâlidesi ve husûs-ı âti’l-beyâna vekîli olup, hükm-i şer‘î-i câhid mahzarında mezbûreyi ma‘rifet-i şer‘iyye ile ârifeyn olan Musa Efendi b. Sun‘[ullah] el-imâm ve Mustafa b. Yunus şehâdetleriyle şer‘an vekâleti sâbite olan Ümmî Hâtun bt. Mehmed meclis-i şer‘-i şerîfde, sığār-ı mezbûrenin kıbel-i şer‘den mansûb vasîleri olan Mehmed Paşa b. Hasan nâm râcil mahzarında takrîr-i kelâm edip, müteveffâ-yı mezbûrun muhallefât-ı beyne’l-vârise taksîm olundukda kızım mezkûre Belkıs hâmil olmak hasebiyle muhallefâtdan hamli için re’y-i hâkimü’ş-şer‘ ile yirmi dokuz bin beş yüz akçe hisse vasiyy-i mezbûra teslîm olunmuşidi. Hâlâ müvekkilemin hamli zuhûr etmeğin, meblağ-ı mezbûr dahi teslîm olundukda, mezbûrenin hissesine üç bin yedi yüz akçe isâbet etmişidi. Meblağ-ı mezbûru vasiyy-i mezkûrûn yedinden bi’t-tamâm ahz u kabz etti, bir akçe kalmadı dedikde, vekîl-i mezbûru ikrâr-ı meşrûhunda vasiyy-i merkūm bi’l-muvâcehe tasdîk edip, mâ hüve’l-vâki‘ ketb olundu. Hurrire fi’l-yevmi’s-sâdis aşer min Recebi’l-mürecceb li sene seb‘a ve ışrîn ve elf. Şuhûdü’l-hâl: Mehmed b. Mustafa, Mustafa b. Mehmed, Mehmed b. el-Hâc Mehmed, Mustafa b. Ahmed.