İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 380 Hüküm no: 564 Orijinal metin no: [65b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Bedreddin’in, İsmail Efendi’de ev satışından kalan alacağını tahsil ettiği Mahmiye-i İstanbul’da Karagümrük mahallesi sâkinlerinden olup bi’l-fi‘il şehirde sâkin olan Cafer b. Bedreddin nâm kimesne tarafından husûs-ı âti’z-zikre vekîl olup, nehc-i şer‘î üzre vekâleti sâbite olan Kara Mehmed nâm kimesne meclis-i şer‘-i şerîfde İsmail Efendi mahzarında üzerine bi’l-vekâle da‘vâ edip, bundan akdem müvekkilim mezbûr Cafer mahalle-i mezbûrede vâki‘ lede’l-ahâlî ma‘lûmü’l-hudûd olan bir mülk menzilini mûmâ-ileyh İsmail Efendi’ye on iki bin nakd-i fiddî akçeye bey‘-i kat‘î ile bey‘ edip, ol dahi iştirâ ve kabûl etdikden sonra semeni merkūmdan on bir bin akçesin ahz u kabz edip, bin akçesi mezbûr İsmail Efendi’nin zimmetinde bâkī kalmışdır. Suâl olunup vekâlet-i mahkiyem hasebiyle alıverilmesini taleb ederim dedikde, gıbbe’s-suâl mezbûr İsmail Efendi ikrâr edip, fi’l-vâki‘ vech-i muharrer üzre merkūm Cafer’den menzil-i mezbûru on iki bin akçeye iştirâ edip, meblağ-ı merkūmdan on bir bin akçeyi benden taleb ve da‘vâya mezbûr Kara Mehmed’i vekîl ettiği ma‘lûmum değildir deyi inkâr etmeğin, mezbûr Kara Mehmed’in sıdk-ı makāline beyyine taleb olundukda, udûl-i ahrârdan Ramazan Efendi b. Bedreddin ve Cavid b. Abdullah nâm kimesneler li ecli’ş-şehâde hâzırân bi’l-meclis olup, gıbbe’l-istişhâd edâ-yı şehâdet-i şer‘iyye edip, fi’l-vâki‘ vech-i muharrer üzre mezbûr Cafer zikr olunan menzil bahâsından olan meblağ-ı bâkī bin akçeyi mûmâ-ileyh İsmail Efendi’den taleb ve da‘vâ ve ahz u kabz ve îsâle mezbûr Kara Mehmed’i huzûrumuzda vekîl etti. Bu husûsa şâhidleriz, şehâdet dahi ederiz dediklerinde gıbbe ri‘âyet-i şerâ’iti’l-kabûl şehâdetleri hayyiz-i kabûlde vâki‘ oldukdan sonra, mûcibi ile hükm olundu. Mâ hüve’l-vâki‘ ketb [olundu]. [Tarih yazılmamıştır]. [Şuhûdü’l-hâl:] el-Hâc Ali b. Abdullah, Halil b. Hacı İbrahim, Halil b. Hüdâverdi, Mahmud b. Bâli.