İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 388 Hüküm no: 578 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdurrahman b. Seyyid Hamza ile Hacı Behrâm b. Abdullah’ın dükkânlarını genişleterek yola tecavüzden men edilmesi Mahmiye-i İstanbul’da Bakkalzâde Mehmed Efendi vakfına mütevellî olan Hasan b. Abdullah meclis-i şer‘a gelip takrîr-i kelâm edip, vakf-ı mezbûrda mahmiye-i mezbûrede Tavukpazarı’nda vâki‘ vâkıf-ı mezbûre intimâ’ ile tahdîdden müstağnî olan dekâkînin kârgir duvarına muttasıl olan dükkânın icâre-i mu‘accele ve müeccele ile müste’cir-i olan es-Seyyid Abdurrahman b. es-Seyyid Mehmed ve el-Hâc Behrâm b. Abdullah vaz‘-ı kadîme muhâlif, dükkân-ı mezbûrun kapısı önüne yol üzerine tecâvüz etmişlerdir. Kıbel-i şer‘den üzerine varılıp ba‘de’l-müşâhede mezbûrâna def‘ine tenbîh ve tahrîr olunmasını taleb ederim dedikde, savb-ı şer‘den Mevlânâ Şaban Efendi ve Hâssa mi‘mârlarından Üstâd Ali b. Memi irsâl olunup, onlar dahi zeyl-i kitâbda mastûrü’l-esâmi olan Müslimîn ile mahall-i mezbûra varıp mezbûrân es-Seyyid Abdurrahman ve el-Hâc Behrâm muvâcehelerinde nazar ve mesâha eylediklerinde, zikr olunan kârgir yolun arzı iki buçuk zirâ‘ olup ve mezbûrân es-Seyyid Abdurrahman ve el-Hâc Behrâm dükkânları tarîk-i mezbûr önüne on parmak mütecâsirler bulunmağın, mevlânâ-yı mezbûr mahallinde tahrîr ve def‘ine mezbûrâna tenbîh olundukdan sonra gelip haber vermeğin, mâ hüve’l-vâki‘ bi’t-taleb kayd şüd. Hurrire fî evâhiri Receb sene [10] 27. Şuhûdü’l-hâl: Mustafa Bekir b. Kasım el-cündî, Ali b. ( ) er-râcil, el-Hâc Mustafa b. Ramazan ve gayruhüm.