İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 412 Hüküm no: 623 Orijinal metin no: [73a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ümmühâni Hâtun’un mîrâsçılarının anlaştıkları Mahmiye-i İstanbul’da bundan akdem vefât eden Ümmühâni Hâtun bt. es-Seyyid Ali Efendi’nin verâseti zevci Derviş Mehmed Efendi b. Osman Efendi’ye ve vâlidesi Fâtıma bt. Mahmud’a ve li ebeveyn kız karındaşı Safiye Hâtun’a münhasıra idiği zâhir ve mütehakkik oldukdan sonra, mezbûr Derviş Mehmed Efendi tarafından husûs-ı âti’z-zikre vekîl olup hasm-ı şer‘î-i câhid mahzarında Ahmed b. Mehmed ve Süleyman b. Abdullah şehâdetleri ile şer‘an vekâleti sâbite olan Osman Çavuş b. Mahmud ve meclis-i şer‘de, mezbûretân Fâtıma ve Safiye hâtun taraflarından husûs-ı âti’l-beyâna vekîl olup, vekâleti Süleyman b. Abdullah ve Ali b. Abdullah şehâdetleri ile şer‘an sâbite olan Hacı Çavuş b. Mustafa mahzarında ikrâr edip, verese-i mezbûre müteveffât-ı merkūmeden kendilere intikāl eden muhallefât-ı beynlerinde alâ mâ farazallâhü te‘âlâ taksîm edip, her biri hisse-i şer‘iyyelerini kabz ettikden sonra, müteveffât-ı mersûmenin muhallefâtına müte‘allik olan âmme-i da‘âvâdan bir birinin zimmetlerini ibrâ-i âm ile ibrâ ettiler. Ba‘de’l-yevm her hangisinden husûs-ı mezbûre müte‘allik da‘vâ sudûr ederse, inde’l-hükkâmi’l-kirâm mesmû‘a ve makbûle olmaya dedikde, mezbûretânın vekîli olan merkūm Hacı Çavuş fi’l-hakīka hâl zikr olunan minvâl üzre olmuşdur deyû mersûm Osman Çavuş bi’l-muvâcehe tasdîk etmeğin, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşere min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Davud Efendi, Hüseyin Efendi b. Mustafa, Ahmed Efendi el-kadı, İbrahim Efendi b. Ahmed.