İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 419 Hüküm no: 634 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Mavrodi ile Yorgi v. Mihal’in ortak aldıkları sütçü dükkânı anlaşmazlığının giderildiği Mahmiye-i İstanbul’da Mustafa Paşa mahallesi sâkinlerinden Nikola v. Mavrodi nâm zimmî mahfil-i kazâda Yorgi v. Mihal nâm zimmî muvâcehesinde üzerine da‘vâ edip, bundan akdem mahalle-i mezbûrede vâki‘ bir tarafdan Mehmed b. Abdullah mülkü ve bir tarafdan Musa b. Abdullah mülkü ve bir tarafdan İbrahim b. Abbas mülkü ve bir tarafdan tarîk-i âm ile mahdûd olup, bir bâb sütçü dükkânını târih-i kitâbdan on altı yıl mukaddem Mehmed b. Abdullah nâm kimesneden ber vech-i iştirâk ale’s-seviyye altmış beş bin nakd râyic fi’l-vakt akçeye iştirâ edip, hâlâ mezbûr Nikola bi gayri vech-i şer‘î beni tasarrufdan men‘ eder. Suâl olunup kasr-ı yed olunmak taleb ederim, suâl olunsun dedikde, gıbbe’s-suâl mezbûr Nikola cevâbında, fi’l-hakīka vech-i meşrûh üzre dükkân-ı mezkûrûn nısf-ı şâyi‘i benim mülküm ve nısf-ı şâyi‘-i âharı mezbûr Yorgi’nin mülküdür. Keyfemâ yeşâ ve yehtâr mutasarrıf olsun dedikde, mukırr-i merkūmun vech-i muharrer üzre cârî olan ikrârını el-mukarru lehü’l-mezbûr bi’l-muvâcehe tasdîk ve tahkīk edicek, mâ vaka‘a bi’t-taleb ketb olundu. Hurrire fi’l-yevmi’l-ışrîn min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Haydar subaşı b. Abdullah, Ali Bey b. Abdullah, Mehmed b. Ömer er-râcil, Mustafa Çelebi b. Mehmed er-râcil, Pervâne b. Abdullah.