İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 420 Hüküm no: 636 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Yusuf’u mahkemeye getiren Halil b. İbrahim’in kefâletinin kaldırıldığı Celeb tâ’ifesinden olan Dimo v. Yani nâm zimmî meclis-i şer‘-i şerîfde, işbu sâhibü’l-kitâb Halil b. İbrahim nâm kimesne muvâcehesinde ikrâr ve i‘tirâf edip, bundan akdem mezbûr Halil işbu hâzıra bi’l-meclis olan Ayşe bt. Yusuf nâm hâtunun nefsine ve hîn-i mütâlebede meclis-i şer‘-i şerîfe ihzârına benim talebim ile kefîl olmuş idi. El-hâletü hâzihî mezbûr Halil merkūme Ayşe’yi meclis-i şer‘-i şerîfde bana teslîm edip, ben dahi mezbûr Halil’in zimmetini kefâlet-i mezbûreden ve mütâlebeden berî eyledim dedikde, gıbbe’t-tasdîk mâ vaka‘a kayd şüd. Fi’t-târihi’l-mezbûr. Şuhûdü’l-hâl: Murad b. Mehmed, Mustafa b. Hamza, Mahmud b. Bâli, Osman b. Abdullah.