İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 434 Hüküm no: 664 Orijinal metin no: [78b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Abdullah’ın çocuklarının Râbia ile mîrâs anlaşmazlıklarını sulh olduğu Mahmiye-i İslâmbol’da Cafer Subaşı mahallesi sâkinlerinden olup, bundan akdem vefât eden kudemâdan Abdullah’ın verâseti, sulbiye kebîre kızları Kerime ve Râbia ve Nisâ’ya münhasıra olduğu mütehakkik oldukdan sonra merkūmetân Kerime ve Nisâ meclis-i şer‘-i kavîmde, menzil-i âti’l-beyâna vâzı‘atü’l-yed olduğu şer‘an sâbite olan hâmil-i hâze’l-kitâb merkūm Râbia muvâcehesinde herbiri ikrâr ve takrîr-i kelâm edip, mahalle-i mezbûrede vâki‘ bir tarafdan Hayran b. Abdullah mülkü ve bir tarafdan pazarcı Hasan mülkü ve bir tarafdan tarîk-i âm ve bir tarafdan tarîk-i hâs ile mahdûd olup, iki bâb ulvî evleri ve bir bâb fevkānî odayı ve bir fırını ve havlulu ve bir dut ağaçlı ve asmayı müştemil olan menzil, müteveffâ-yı mezbûr babamızdan irs-i şer‘ ile üçümüze intikāl etmekle, menzil-i mezbûrdan bize âid olan hisse-i şer‘iyye-i şâyi‘amızı merkūme hemşîre ve Râbia’dan taleb eylediğimizde, ol dahi ta‘allül etmekle mâ beynimizde nizâ‘-ı kesîr vâki‘ olmuş idi. El-hâletü hâzihî muslihûn tavassutu ile her birimize üçer bin akçe vermek üzre mâ beynimizi ıslâh ve tevfîk ettiklerinde, biz dahi sulh-ı mezbûru kabûl ile aslah olan meblağ-ı mezbûr üçer bin akçeyi her birimiz merkūm Râbia Hâtun yedinden bi’t-tamâm ahz u kabz edip, zikr olunan menzil-i mezbûre müte‘allik âmme-i da‘âvâdan mezbûre Râbia’nın zimmetini ibrâ-i âmm-ı kātı‘ü’n-nizâ‘ ile ibrâ ettik. Ba‘de’l-yevm aslen ve vekâleten husûs-ı mezbûre da‘vâ sâdır olursa lede’l-hükkâm-ı zevi’l-ihtirâm mesmû‘a olmaya dediklerinde, mukırretân-ı merkūmetân Kerime ve Nisâ’yı ikrâr-ı meşrûhlarında el-mukarru lehü’l-mezbûre Râbia vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb olundu. Fi’t[-târihi’l]-mezbûr. Şuhûdü’l-hâl: Mehmed [b.] Pîrî el-imâm, Rıdvan [b.] Abdullah el-müezzin, İlyas [b.] Hızır, Abdülbâkī [b.] Ebûbekir, Rıdvan Bey [b.] Abdullah, Kasım Ağa [b.] Abdullah, Mustafa [b.] Mehmed, Abdullah [b.] Halil ve gayruhüm.