Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 176 Hüküm no: 160 Orijinal metin no: [33a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın Rus asıllı cariyesi Sertabe’yi azat etmesi Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ İbrahim Efendi b. Şa‘bân irsâl olunup ol dahi fahrü’l-muhadderât Fâtıma Hanım bt. Mehmed Ağa mahmiye-i İstanbul’da Molla Şeref mahallesinde vâki‘ menziline varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf etdikde mûmâ-ileyhâ Fâtıma Hanım zâtını ma‘rifet-i şer‘iyye ile ârifân mahalle-i mezbûre sükkânından Mahmud Efendi b. Şa‘bân ve İbrahim Efendi b. Derya nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûrda ikrâr ve takrîr-i kelâm edip bana rıkkını mu‘terife olan işbu orta boylu açık kaşlı, elâ gözlü Rusiyyetü’l-asl bâ‘isetü [33b] hâze’l-kitâb Sertâbe bt. Abdullah nâm câriyemi hasbeten lillâhi’l-hallâk ve taleben li-merzâti’r-rabbi’r-rezzâk malımdan tahrîr ve i‘tâk ve zümre-i harâir-i asliyâta idrâc ve ilhâk eyledim ba‘de’l-yevm mevsûfe-i mezbûre Sertâbe sâir harâir-i asliyât gibi hürre olup üzerinde mevâlî için sâbit olan velâ-yı şer‘îden gayrı hakkım kalmadı dedikde gıbbe’t-taleb husûs-ı mezbûru mevlânâ-yı mezbûr mahallinde tahrîr, ba‘dehû ma‘an irsâl olunan İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-ferd li-sene ihdâ ve semânîn ve elf. Şuhûdü’l-hâl: Es-Sâbıkūn.