İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 446 Hüküm no: 684 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haseki Sultan Vakfı’na ait harap şemhânenin peşin (mu‘accel) kira karşılığı tamir edildiği Mahmiye-i İstanbul’da sâhibetü’l-hayrât merhûme Haseki Sultan -tâbet serâhâ- Evkāfı’ndan Edirnekapısı hâricinde vâki‘ şem‘hâne dükkânından olup, hudûdunun bir tarafı Miro v. Andriye ve bir tarafı Toma nâm zimmî dükkânına ve bir tarafı selhâne duvarına ve bir tarafı tarîk-i âm ile mahdûd olan, yevmî üç akçe icâre-i müeccele ve mu‘accelelü bir bâb şem‘hâne dükkânına ber vech-i iştirâk mutasarrıf olan Dimitri v. Andriye ve Hıristo v. Avro nâm zimmîler meclis-i şer‘a gelip takrîr-i kelâm edip, dükkân-ı mezbûr bundan akdem harâbe müşrif olup ta‘mîre muhtâc oldukda, mâl-ı vakıfdan müsâ‘ade olmamağın, bi’l-fi‘il vakf-ı mezbûra mütevellî olan fahrü’l-emâsil ve’l-akrân Musa Bey b. Ali el-Bevvâbü’s-sultânî, bundan akdem bin akçeye taksîm olunan noksanından mâ‘adâ kendi mâlımdan ne mikdâr akçe harc ve sarf olunursa mukaddemâ verdiğimiz icâre-i mu‘accelemize münzam olmak üzre müceddeden binâsına izin verip, yedimize tezkire vermiş idi deyû, mütevellî-i merkūmun imzâsıyla mümzâ ve hâtemi ile mahtûme bin on beş Zilhiccesi’nin târihi ile müverraha tezkire ve vech-i meşrûh üzre izinnâmesini ibrâz eyleyip, el-hâletü hâzihî dükkân-ı mezbûru vech-i meşrûh üzre ta‘mîr eyledik, cânib-i şer‘-i şerîfden üzerine varılıp hakīkat-i hâl keşf oldukdan sonra ne mikdâr meblağ harc ve sarf olunmuşdur, tahammülü tahrîr olunmak taleb ederiz dediklerinde, cânib-i şer‘-i kavîmden Üstâd Hasan b. Abdullah nâm mi‘mâr-ı hâssa ile üzerine varılıp, mütevellî-i merkūm mahzarında zeyl-i kitâbda mastûrü’l-esâmi olan Müslümanlar ile keşf olundukda, fi’l-vâki‘ dükkân-ı mezbûru müste’cirân-ı merkūmân imâret eyledikleri mukarrer olmağın, tûlen ve arzan bi hesâbi’t-terbî‘î dört yüz on altı zirâ‘ sakfına otuz beş akçede on beş bin beş yüz altmış ve üç yüz doksan altı zirâ‘ döşemelerine yirmi bin sekiz yüz kırk akçe ve tahta perdelerine ve pencerelerine ve kepenklerine sekiz bin iki yüz elli altı akçe ve merdiven ve direklerine ve kürsü taşlarına altı bin yüz on sekiz akçe ve taş duvarına ve kenîf ve kaldırımlarına yedi bin iki yüz akçe harc ve sarf olunup, ebniye-i merkūmenin cem‘an elli yedi bin dokuz yüz yetmiş dört akçeye tahammülü vardır, noksanıyla kābil-i ta‘mîr değildir deyû mi‘mâr-ı mezbûr ve sâir bî-garaz Müslümanlar alâ tarîki’l-ittifâk ihbâr eylediklerinden sonra, mukaddemâ nakz için takdîm olunan yedi bin akçe ifrâz olunup, bundan mâ‘adâ elli bin dokuz yüz yetmiş dört akçenin yirmi beş bin dört yüz seksen yedi akçesi mezkûr Dimitri’nin ve yirmi beş bin dört yüz seksen yedi akçesi mezbûr Hıristo zimmînin olmak üzre, mâ vaka‘a bi’t-taleb ketb olundu. Tahrîren fî evâsıtı şehri Rebî‘ilevvel li sene sitte aşere ve elf. Şuhûdü’l-hâl: Mehmed b. Hasan, Hasan b. Hüseyin, Hamza b. Abdullah er-râcil, Musli b. Ali, Mehmed b. Abdullah, İlyas b. Abdullah ve gayruhüm.