İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 107 Hüküm no: 15 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bendayin? v. Serkiz’in muhallefatından olup satılan arsadan küçük çocuklarının hissesi olan bedeli vasîleri olan annelerinin aldığı Mahmiye-i İstanbul’da Cerrâhbaşı İshakağa mahallesi mütemekkinlerinden iken bundan akdem hâlik olan Bendayin? v. Serkiz nâm Ermeni’nin verâseti zevce-i metrûkesi Gevher bt. Hürmüz nâm Ermeni’ye ve (…) kebîr oğlu Aritun ve sulbî sagīr oğulları Serkiz ve Yoseb ve sulbiye sagīre kızları Zümrüd ve Emvane’ye? münhasıra olduğu ve tashîh-i mes’eleleri altmış dört sehimden olup sihâm (…) mezbûreden sekiz sehm zevcesi mezbûre Gevher’e ve on dörder sehmi oğulları mezbûrûna ve yedişer sehmi kızları mezbûretâna isâbet eylediği mezbûre Gevher (…) bundan akdem sekiz sehm sümün hissesi mukābelesinde tehârüc-i şer‘î tarîki üzere yirmi kıt‘a riyâlî guruşa sulh olup verese-i mezbûrûn beynlerinden çıkdığı şer‘an zâhir ve mütehakkık ve bâhir oldukdan sonra sagīr-i mezbûr Yoseb’in kıbel-i şer‘den mansûb vasîyy-i şer‘iyesi ve vâlidesi mezbûre meclis-i şer‘den hâlik-i mezbûrun metrûkâtından olup zikri âtî menzil arsasına bi-şirâen vaz‘-ı yed eden işbu hâmilü’s-sifr Ağya v. Safar nâm Ermeni muvâcehesinde bi’l-vesâye ikrâr ve takrîr-i kelâm edip hâlik-i mezbûrun terekesinden olup mahalle-i mezbûrede vâki‘ bir tarafdan Avanos v. Belan? mülküne ve bir tarafdan Mahavir mülküne ve iki tarafdan tarîk-i hâssa müntehî olup harîk-i gālibeden muhterik olan menzil arsasının mecmû‘u vasîsi olduğum sagīr-i mezbûrun li-eb karındaşı mezbûr Aritun sıgār-ı mezbûrûnun zarûret-i nafakaları’çün ba‘de’l-müzâyedeti’l-mu‘tebere mezbûr Ağya’ya on üç bin akçeye bâtten bey‘ ve kabz-ı semen etmeğin vasîsi olduğum sagīr-i mezbûrun altmış dört sehimden on dört sehm hissesi mukābelesinde semen-i mezbûrdan isâbet eden meblağı vesâyeten mezbûr Aritun yedinden sagīr-i mezbûr için alıp kabz eyledim. Min-ba‘d arsa-i mezkûrede vasîsi olduğum sagīr-i mezbûr Yoseb’in alâka ve medhali kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd sene [10]72. Şuhûdü’l-hâl: es-Seyyid Ali Çelebi b. es-Seyyid fahrü’l-imâm?, Mustafa Çelebi b. ( ), Mehmed Çelebi [b.] Mustafa, İbrahim Çelebi b. Mustafa, Rasûl [b.] Rıdvan.