İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 283 Hüküm no: 256 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa eşi Mehmed b. Abdullah’dan boşandığı İsbât-ı hul‘. Mahmiye-i İstanbul’da Ali Paşa-yı Atik mahallesi sâkinelerinden Fâtıma bt. Mustafa nâm hatun mahfil-i kazâda mukaddemâ zevci olan işbu râfi‘u’l-kitâb Mehmed b. Abdullah mahzarında üzerine da‘vâ ve takrîr-i kelâm edip mezbûr Mehmed mukaddemâ zevcim olup beni bâyin-i talâk ile tatlîk eylediğinde zimmetinde mütekarrir ve ma‘kūdün-aleyh olan beş yüz akçe mehr-i müeccelim ve nafaka-i iddet-i ma‘lûmem mezbûr Mehmed’in zimmetinde bâkī kalmışdır taleb ederim suâl olunup alıverilmesi matlûbumdur dedikde gıbbe’s-suâl mezbûr Mehmed cevâbında fi’l-vâki‘ müdde‘iyye-i mezbûre Fâtıma bundan akdem zevcem olup zimmetimde olan beş yüz akçe mehr-i müecceli ve nafaka-i iddet-i ma‘lûmesinden fâriğa olup me’ûnet-i süknâsı dahi kendi üzerine olmak üzere huzûr-ı Müslimînde benim ile muhâla‘a-i sahîha-i şer‘iye ile muhâla‘a edip ben dahi minvâl-i muharrer üzere hul‘-ı mezbûru kabûl eyledim deyicek gıbbe’l-istintâk ve’l-inkâr merkūm Mehmed’den sıdk-ı makālini mübeyyin beyyine taleb olundukda udûl-i Müslimînden olup yine mahalle-i mezbûre sâkinlerinden Hüseyin b. Mehmed ve Ali b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘iyye-i mezbûre Fâtıma mezbûr Mehmed’in zevcesi olup beynlerinde hüsn-i zindegâneleri olmamakla mezbûr Mehmed’in zimmetinde olan beş yüz akçe mehr-i müecceli ve nafaka-i iddet-i ma‘lûmesinden mâ‘adâ me’ûnet-i süknâsı dahi mezbûre Fâtıma’nın üzerine olmak üzere muhâla‘a-i sahîha-i şer‘iye ile muhâla‘a edip mezbûr Mehmed dahi minvâl-i muharrer üzere hul‘-ı mezbûru kabûl eyledi biz husûsa minvâl-i muharrer üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’iti’’l-kabûl şehâdetleri makbûle oldukdan sonra mezbûre Fâtıma bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Hüseyin b. Mustafa, Ahmed Beşe b. Abdullah, Abdullah Çelebi b. Halil, Muharrem b. Ahmed.