İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 467 Hüküm no: 519 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atike Hatun bt. Kurt’un Ayezmend kazasındaki hanını Mehmed Bey b. Gazanfer’in vekaletiyle Emrullah Ağa b. Mahmud’a sattığı Mübâya‘a bi’l-vekâle. Mahmiye-i İstanbul’da Lalegüzâr/Lalezâr? mahallesinde sâkine Atîke Hatun bt. Kurt tarafından zikri âtî hanı bey‘ ve semenini kabza vekîl olup mefharu’l-kuzât Burûsî Hüseyin Efendi b. el-Hâc İsa ve Keşfî Mustafa Efendi b. Muharrem şehâdetleri ile şer‘an vekâleti sâbit olan Mehmed Bey b. Gazanfer meclis-i şer‘de işbu kitâbın sahibi umdetü’l-emâsil ve’l-a‘yân makbûlü’s-sudûr ve’l-erkân Emrullah Ağa b. Mahmud mahzarında bi’l-vekâle ikrâr ve i‘tirâf edip müvekkilem mezbûrenin kızı Sâliha bt. Mahmud’dan kendiye intikāl edip vilâyet-i Anadolu’da Ayazmend kasabasında Sinanpaşa Câmi‘-i şerîfi kurbünde vâki‘ lede’l-ahâlî ve’l-cîrân ma‘lûmü’l-hudûd mülk hanı mezbûr Emrullah Ağa’ya vekâleten yirmi iki bin akçeye bâtten bey‘ ve teslîm edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr yirmi iki bin akçeyi mezbûr Emrullah Ağa yedinden vekâlet-i mahkiyem hasebiyle ahz u kabz eyledim. Zikr olunan hân mülk-i müşterâsı olmuşdur. Mezbûr Emrullah Ağa’yı mahâllinde kabza taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.