İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 600 Hüküm no: 694 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Hızır’ın Ahmed Çelebi b. Bali zimmetinde bulunan parasını aldığı Dârü’l-hilâfeti’l-aliyye Kostantıniyyeti’l-mahmiye’de Emin-Nureddin mahallesinden Mehmed Beşe b. Hızır meclis-i şer‘de işbu bâ‘isü’l-kitâb Ahmed Çelebi b. Bali ikrâr ve i‘tirâf edip hâl-i sığarında bundan esbak fevt olan Halil Ağa b. İbrahim kıbel-i şer‘den mansûb vasîm olmağla babam mezbûr Hızır ile vâlidem Belkıs’dan intikāl eden yüz yirmi sekiz bin dokuz [yüz] yirmi akçeyi kabz ve ba‘dehû sefere gittiği hînde merkūm Ahmed Çelebi’ye teslîm ol dahi ahz u kabz etmiş idi el-hâletü hâzihî meblağ-ı mezbûr yüz yirmi sekiz bin dokuz yüz yirmi akçeyi mezbûr Ahmed Çelebi yedinden bi’t-tamam ahz u kabz eyledim yedinde bir akçe ve bir habbe bâkī kalmadı dedikde mukırr-ı mezbûrun ikrârını el-mukarru lehu’l-merkūm Ahmed Çelebi bi’l-muvâcehe tasdîk ve bi’l-müşâfehe tahkīk edecek mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ahmed Hoca türbedâr, Hamza Çelebi b. Ahmed, Ali Beşe b. Mehmed, Osman Beşe ser-oda, Rasûl b. Rıdvan.