İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 709 Hüküm no: 850 Orijinal metin no: [107b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mahmud Efendi’nin vakıf arsa üzerindeki binalarını elli bin akçeye Halil Halife b. Şaban’a sattığı Ferâğ-ı menzil. Mahmiye-i İstanbul’da Pîrînçci Sinan mahallesinden olup hâlâ sahn müderrisi olan efdalü efâdılı’l-müderrisîni’l-kirâm Mahmud Efendi b. ( ) meclis-i şer‘-i şerîf-i lâzımü’t-teşrîfde Dergâh-ı âlî yeniçerilerinin ocağı halîfelerinden işbu bâ‘isü’l-kitâb Halil Halîfe b. Şaban mahzarında ikrâr ve i‘tirâf edip mahmiye-i mezbûrede Kādıasker mahallesinde vâki‘ bir tarafdan Medîne-i Münevvere Vakfı’na ve bir tarafı Yenibağçe bostanına ve bir tarafı sâbıkā yeniçeri efendisi iken vefât eden Mehmed Efendi menziline ve bir tarafı tarîk-i hâssa müntehî dâhiliyesi iki bâb fevkānî odaları ve hâriciyesi bir bâb fevkānî oda ve bi’r-i mâ ve bir mikdâr havluyu müştemil olup merkūm Hayreddin Dede nâm sahibü’l-hayrın süknâsını ulemâdan bir recül-i sâliha şart eylediği menzile ben tevcîh-i hâkimü’ş-şer‘le mutasarrıf iken menzil-i mezbûrda izn-i mütevellî ve ma‘rifet-i hâkimü’ş-şer‘ kendi nefsim için mülküm olmak üzere nice ebniye ihdâs etmiş idim el-hâletü hâzihî ebniye-i memlûkemi mezbûr Halil Halîfe’ye bâtten elli bin akçeye bey‘ ve teslîm ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûru merkūm Halil Halîfe yedinden tamamen ahz u kabz eyledim dedikde gıbbe’t-tasdîk mûmâ-ileyh Mehmed Efendi arsasını dahi ehl-i ilim ve sulehâdan olup meskene eşedd-i ihtiyâcla muhtâc olan mûmâ-ileyh Halil Halîfe’ye hüsn-i ihtiyârıyla fâriğ olmağın kıbel-i şer‘den dahi tevcîh olunup mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Receb Efendi b. Sâdık el-imâm, Ahmed b. Mehmed el-müezzin, Mustafa Efendi b. Ahmed, Yusuf b. Mehmed el-yesârî, Mehmed Beşe b. Abdullah, Mustafa b. Abdullah er-râcil, Hasan Beşe b. ( ) 60. c[emâ‘at], Mehmed Beşe b. ( ) 60. c[emâ‘at], Zülfikar b. Abdullah 43. c[emâ‘at], Hüseyin b. Mehmed.