İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 831 Hüküm no: 1015 Orijinal metin no: [140b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş b. Abdülaziz’in Rus asıllı cariyesi Gülbuy’u azat ettiği Mahmiye-i İstanbul’da Karaköy Kapısı kurbünde sâkin Ali Çavuş b. Abdülaziz nâm kimesne meclis-i şer‘-i hatîr-i lâzımü’t-tevkīrde kendüye rıkkını mu‘terife olan orta boylu açık kaşlı koyun elâ gözlü Rusiyyetü’l-asl hâfızetü hâze’l-kitâb Gülbûy bt. Abdullah nâm câriye-i memlûkesi muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î edip evsâf-ı mezkûre ile mevsûfe olan mezbûr Gülbûy’u hasbeten lillâhi te‘âlâ taleben li-merzâti Rabbi’l-a‘lâ tahrîr ve i‘tâk ve zümre-i harâ’ir-i asliyâta ilhâk eyledim min-ba‘d mezbûre Gülbûy sâir harâ’ir-i asliyât gibi hürre olup üzerinde mevâlî içen şer‘an sâbit olan hakk-ı velâdan gayrı hakkım kalmadı dedikde gıbbe’t-tasdîk mâ-vaka‘a bi’t-taleb ketb olundu. Hurrire fi’l-yevmi’l-hâdî aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mehmed Efendi el-imâm, Ömer Odabaşı, Hüseyin Çelebi el-müezzin, Yusuf b. Abdullah el-kayyum, el-Hâc Ahmed b. el-Hâc Ömer, el-Hâc Mehmed b. Cemaleddin, Mehmed Odabaşı b. Eyüb, Mustafa Odabaşı.