İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 886 Hüküm no: 1091 Orijinal metin no: [152a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Vildan’ın muhâlaa yoluyla kocası Sıyami b. Satı’dan boşandığı Mahmiye-i İstanbul’da Âbid Çelebi [mahallesinde] sâkine Hadîce bt. Vildan nâm hatun meclis-i şer‘-i hatîr-i lâzımü’t-tevkīrde zevci işbu bâ‘isü’l-kitâb Sıyami b. Satı nâm kimesne mahzarında ikrâr ve takrîr-i kelâm edip zevcim mezbûr Sıyami zimmetinde mütekarrir ve ma‘kūdün-aleyh olan iki bin akçe mehr-i mü’eccelimin iki yüz akçesini yedinden ahz u kabz edip meblağ-ı bâkī bin sekiz yüz akçe mehr-i mü’eccelim üzerine ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere zevcim mezbûr Sıyami ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahhiren fi’l-yevmi’s-sâdis min-Muharremi’l-harâm li-sene 1073. Şuhûdü’l-hâl: Abdi Çelebi b. Hüseyin, Abdülbaki b. Mehmed, Pîrî b. Ali, Yunus b. Nuh, İbrahim Efendi b. Ahmed, Hüseyin Efendi b. Ali el-imâm, Ramazan Beşe çukadâr.