İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 900 Hüküm no: 1110 Orijinal metin no: [154b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursalı Hacı Ahmed’in vakfettiği menzile Mehmed Ağa b. Mustafa’nın hasbî mütevelli tayin olunduğu Merhûm Burûsî el-Hâc Ahmed nâm sahibü’l-hayr vakıf ve süknâsını ulemâdan bir recül-i sâliha şart ve ta‘yîn eylediği mahmiye-i Kostantıniyye’de Debbağzâde mahallesinde vâki‘ bir tarafı el-Hâc Yusuf mülküne ve bir tarafı Berber Hasan mülküne ve iki tarafı tarîk-i âmma müntehî büyûtı hâvî menzilin mütevellîsi olmayıp bir mütevellî nasbı lâzım ve mühim olmağın işbu bâ‘isü’l-kitâb Mehmed Ağa b. Mustafa her vechile tevliyet uhdesinden gelmeğe kādir ve dîndâr ve müstakīm olmağın kıbel-i şer‘den mezbûr Mehmed Ağa menzil-i mezkûra hasbî mütevellî nasb ü ta‘yîn olundukda ol dahi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Muharrirü’l-hurûf ve’s-sütûr Ahmed, Mahmud Efendi el-kādî, Kastamonî Mehmed Efendi, el-Hâc Ahmed b. Mahmud.