İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 901 Hüküm no: 1113 Orijinal metin no: [154b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki zücaciyecilere/aynacılara mahsus malların alım-satım işlerine Mehmed Beşe b. Mehmed’in müdahalesinin men’i Mahmiye-i İstanbul’da billûr âyine-fürûz tâifesinin kethudâları Mehmed b. Mirza ve yiğitbaşıları Ali Beşe b. Hamza ve tâife-i mezbûreden Ali Çelebi b. Veli ve Ebûbekir b. Mahmud ve Mehmed b. Veli ve İbrahim b. Süleyman ve Mahmud b. Abdullah ve sâirleri meclis-i şer‘-i hatîrde Mehmed Beşe b. Mehmed mahzarında her biri takrîr-i kelâm edip taşradan gelen billûr âyineyi alıp satmak kadîmü’l-eyyâmdan bizim hirfetimiz ashâbına mahsûs olup âhar kimesneye müdâhale etmemek üzere yedimizde emr-i şerîf-i pâdişâhî var iken mezbûr Mehmed hilâf-ı emr-i pâdişâhî zikrolunan billûr âyineyi alıp-satmak ile hirfetimiz beynlerinde ihtilâle bâ‘is olmağın hâlâ yedimizde olan emr-i şerîfe nazar olunup mûcebince cânib-i şer‘den dahi men‘ olunmak matlûbumuzdur deyip takrîr-i meşrûhlarına mutâbık emr-i şerîf-i şehin-şâhî ibrâz eylediklerinde ba‘de’n-nazar mûcebince mezbûr Mehmed Beşe’ye tâife-i mezbûreye mahsûs olan metâ‘larında müdâhale etmemek üzere tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-a‘yân Mehmed Ağa, Hasan Beşe b. Ramazan, el-Hâc Mehmed kethudâ-yı muhzırân, Şükrullah b. Mustafa, Abdi b. Hüseyin.