İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 106 Hüküm no: 9 Orijinal metin no: [1b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harun v. İsak isimli Yahudinin vârislerinin Bahçekapı’daki arsalarını Ağazâde Halil Efendi’ye sattıkları Bey‘-i arsa Aragon cemâ‘atinden Harun v. İsak nâm yahudi mukaddemâ hâlik olup verâseti zevce-i metrûkesi Velida bt. Mosi nâm yahudiyeye ve sulbî kebîr oğlu İsak’a ve sulbiyîn kebîre kızları Sultana ve Hanola ve Meyrem’e münhasıra olup ve mezbûrât Velida ve Sultana ve Hanola ve Meyrem taraflarından husûs-ı âti’z-zikre vekîl olup Aragon cemâ‘atinden Menteş v. Bayram ve Hamon cemâ‘atinden Kiresun v. Me[n]teş nâm yahudiler şehâdetleri ile vekâleti sâbite olan mezbûr İsak asâleten ve vekâleten meclis-i şer‘de umdetü’l-mevâ[liyyü’l-]kirâm zübdetü’l-vülâti’l-enâm sâbıkan Üsküdar kadısı olan Ağazâde Halil Efendi taraflarından husûs-ı câ’îye vekîl olan Mustafa Efendi b. Halil mahzarında takrîr-i kelâm edip babamız hâlik-i mezbûrun muhallefâtından olup mahmiye-i İstanbul’da Bahçekapısı dâhilinde sâbıkan Hobyar ve hâlâ Rumeli kazaskeri Kadri Efendi mahallesi denilen mahallede vâki‘ bir tarafdan Hüseyin Ağa menzili ve iki tarafdan tarîk-i âm ve bir tarafdan Nişancı Paşa vakfına müntehî bir zîr-i zemîn üç su kuyusunu ve bir harâbe müşrif hamamı müştemil olup tûlen ve arzen bi hesâb-ı şatrancî bin zirâ‘ arsayı bin yüz esedî guruşa müşârün-ileyh Halil Efendi’ye bâtten bey‘ ve teslîm bizler dahi ber minvâl-i muharrer iştirâ ve tesellüm eyledikden sonra semeni olan meblağ-ı mezbûru müşârün-ileyh Efendi yedinden asâleten ve vekâleten kabz eyledim min ba‘d arsa-i mahdûde-i mezkûra müşârün-ileyh Halil Efendi’nin mülk-i müşterâsı olup keyfe mâ yeşâ’ tasarruf eylesin dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. [Fi]’l-yevmi’l-âşir min şehri Ramazâni’l-mübârek sene 1073. Şuhûdü’l-hâl: Osman Ağa, el-Hâc Yusuf b. Abdullah, Abdi Bey b. Sâbit, Mustafa Çelebi b. Hüseyin, Ebûbekir Çelebi b. Mehmed el-Müezzin, Mehmed Çelebi el-Müezzin, Ahmed Çelebi b. Mahmud Kethüdâ-yı muhzırân.