İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 109 Hüküm no: 15 Orijinal metin no: [2a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malta’da esir es-Seyyid Zeynelabidin Efendi b. es-Seyyid Ahmed’le arkadaşı Mehmed b. Mansur’u esaretten kurtaran Andriye v. Kabril’e kalan borcun tecil edildiği Te’cîl Cezîre-i Malta tâcirlerinden Andriye v. Kabril meclis-i şer‘de es-Seyyid Zeynelabidin Efendi b. es-Seyyid Ahmed muvâcehesinde ikrâr ve takrîr-i kelâm edip mezbûr es-Seyyid Zeynelabidin Efendi benim ile hâlâ cezîre-i Malta[’da] olan Mehmed b. Mansur’u cezîre-i mezbûrede Cemarya ve Patriko ve Andon nâm harbî kefere ellerinde esir iken, sekiz bin yüz yirmi riyâlî guruşa kesip mezbûr es-Seyyid Zeynelabidin Efendi ile refîki mezbûr Mehmed’i tahlîs ettikden sonra, mezbûr es-Seyyid Zeynelabidin Efendi meblağ-ı mezbûr sekiz bin yüz yirmi guruşu İstanbul’da bana tahsîl ve teslîm etmek üzre merkūm Mehmed cezîrede alıkonulup mezbûr es-Seyyid Zeynelabidin Efendi ile hâlâ mahmiye-i İstanbul’a geldikde, yalnız mezbûr es-Seyyid Zeynelabidin Efendi’yi dört bin beş yüz guruşu kat‘ edip meblağ-ı mezbûr dört bin beş yüz guruşdan iki bin riyâlî guruşun[u] mezbûr es-Seyyid Zeynelabidin Efendi yedinden alıp kabz edip bâkī iki bin beş yüz guruşun târih-i kitâbdan yirmi gün tamâmına değin bin guruşun[u] ve seksen gün tamâmına değin bin beş yüz guruşun[u] te’cîl eyledim dedikde gıbbe’t-tasdîk-i şer‘iyye meblağ-ı mezbûr iki bin beş yüz guruş mahmiye-i mezbûrda Ali Paşa mahallesinden es-Seyyid Ali Efendi b. es-Seyyid Hasan ve es-Seyyid Şaban Çelebi b. es-Seyyid Mahmud her biri emr ve kabûlü hâvî kefâlet-i sahîha-i şer‘iyye ile kefîller olmağın mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek sene 1073. Şuhûdü’l-hâl: Abdurrahman Çelebi b. Ahmed el-hatîb, es-Seyyid Mehmed Çelebi b. es-Seyyid Ali, Abdullah Efendi b. Mustafa, es-Seyyid Sadi b. es-Seyyid Nurullah, Muharrem Efendi b. Mustafa, Hacı Mustafa b. Pîrî, el-Hâc Bayram b. Pîrî, el-Hâc Ahmed b. Mahmud ve gayruhüm.