|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 125 Hüküm no: 40 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hatice Kadın bt. Mehmed Bahri Efendi tarafından satılan Rus asıllı ve Şahbaz isimli cariye illetli olduğundan iadesine karar verildiği
Redd-i câriye-i ma‘yûbe Bâ‘isü’l-kitâb Sefer Ağa b. Mustafa meclis-i şer‘-i hatîrde mahmiye-i İstanbul’da Kirmasti mahallesi sâkinelerinden zahrü’l-muhadderât Hatîce Kadın bt. el-merhûm Mehmed Bahri Efendi tarafından zikri âtî da‘vâda husûmet ve redd-i cevâba vekîl olup mezbûreyi bi’l-ma‘rifeti’ş-şer‘iyye ârifân olan el-Hâc Ramazan b. Mehmed ve İbrahim b. Abdülkerim şehâdetleriyle şer‘an vekâleti sâbite olan Halil Efendi b. Hasan muvâcehesinde takrîr-i da‘vâ edip mezkûre Hatîce Kadın târih-i kitâbdan iki ay mukaddem işbu Rusiyyetü’l-asl Şahbaz nâm câriyesini yüz yetmiş esedî guruşa bana bey‘ ve teslîm edip meblağ-ı mezbûr yüz yetmiş esedî guruşu yedimden kabz ve tesellüm etmiş idi hâlâ câriye-i mezbûre tuzlu balgam olduğu ayb-ı kadîmine muttali‘ oldum, ayb-ı mezbûr ınde’t-tüccâr noksan-ı semen îcâb eder uyûbdan olmağın câriye-i mezbûreyi bâyi‘a-i merkūmeye red ve semen deyû mukaddemâ yedimden kabz ettiği meblağ-ı mezbûr yüz yetmiş esedî guruşunu istirdâd ederim vekîl-i mezbûrdan suâl olunsun dedikde gıbbe’s-suâl vekîl-i mezbûr cevâbında fi’l-vâki‘ müvekkile-i mezbûrem Hatîce câriye-i mezbûreyi müdde‘î-i mezbûra iki ay mukaddem yüz yetmiş esedî guruşa bey‘ ve teslîm ve meblağ-ı mezbûru kabz ve tesellüm ettiğini ve câriye-i mezbûrede ayb-ı mezbûrun vücûdunu bi’l-vekâle ikrâr ve ayb-ı mezbûrun kıdemini münkir olıcak müşterî-i mezbûr Sefer Ağa’dan müdde‘âsını mübeyyine beyyine taleb olundukda etıbbâdan Mustafa Efendi b. Mehmed ve Ahmed Efendi b. Mehmed li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu câriye-i mezbûrede olan tuzlu balgam ayıbı kadîmdir ayb-ı mezbûr iki aydan berî hâdis olur ayb değildir ayb-ı kadîm olduğuna biz şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîli’ş-şer‘î şehâdetleri makbûle olmağın müdde‘iyye-i mezbûreye câriye-i mezbûrenin ayıbına muttali‘ oldukdan sonra kabûl etmeyip ve kabûlüne delâlet eder bir fi‘l etmediğine ba‘de’t-tahlîfi’ş-şer‘î câriye-i mezbûreyi tesellüm ve meblağ-ı mezbûru teslîme vekîl-i mezbûr Halil Efendi’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Eş-Şeyh İvaz Efendi, Nasûh Bey el-Cündî Mehmed Ağa sermuhzırân, Abdünnebî Ağa b. Resûl, Abdi Çelebi b. Hüseyin.
|