.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 126
Hüküm no: 42
Orijinal metin no: [4a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayşe bt. Hasan’ın arsasını Şahbaz bt. Abdullah’la Mehmed b. Abdullah’a sattığı

Mülknâme-i arsa-i menzil Mahmiye-i İstanbul’da Muhsine Hâtun mahallesinde sâkine Ayşe bt. Hasan nâm hâtun tarafından husûs-ı câi’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân Ömer b. İbrahim ve el-Hâc Receb b. Mehmed şehâdetleri ile şer‘an vekâleti sâbite olan müezzin Mehmed Efendi b. Mustafa meclis-i şer‘-i hatîrde Şahbaz bt. Abdullah nâm hâtun tarafından ikrâr-ı câi’z-zikri tasdîke sâbitü’l-vekâle vekîl ve kendi tarafından asîl olan zevci Mehmed b. Abdullah mahzarında bi’l-vekâle ikrâr ve takrîr-i kelâm edip müvekkilem mezbûrenin mahalle-i mezbûrede vâki‘ iki tarafdan müvekkilem mezbûre mülkü ve bir tarafdan Bakkal Mehmed Beşe b. Mustafa mülkü ve taraf-ı râbi‘i tarîk-i hâssa müntehî tûlen ve arzen bi hesâb-ı terbî‘î yüz kırk buçuk zirâ‘ mülk muhterik menzil arsasını iştirâk-i seviy üzre mezbûrân Şahbaz ve Mehmed’e yedi bin râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi minvâl-i muharrer üzre iştirâ ve tesellüm eyledikden sonra, semeni olan meblağ-ı mezkûru yedlerinden tamâmen alıp kabz eyledim min ba‘d arsa-i mahdûde-i mezkûre merkūmânın mülk-i müşterâsıdır, benim alâka ve medhalim yoktur dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek sene 1073.


Şuhûdü’l-hâl: Mehmed Efendi b. Yusuf, Mehmed Beşe b. İsâ çörekçi, kalaycı Mehmed Beşe b. Ahmed, Mehmed Beşe b. Mustafa, Mustafa Beşe b. Siyavuş, Abdi Çelebi b. Hüseyin, Ali Çelebi b. Muharrem, kasap Mustafa Çelebi.