.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 127
Hüküm no: 44
Orijinal metin no: [4b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâliha Hâtun bt. Abdullah’a kızı Fâtıma için el-Hâc Mehmed b. Ramazan’ın nafaka ödemesine karar verildiği

Nafaka Mahmiye-i İstanbul’da Kethüdâ Hâtun mahallesinde sâkine Sâliha Hâtun bt. Abdullah meclis-i şer‘de zevc-i mutallıkı el-Hâc Mehmed b. Ramazan mahzarında takrîr-i kelâm edip bi hakki’l-hidâne hâlâ hacr ve terbiyemde olan sadriyye kızım Fâtıma nâm sagīre için savb-ı şer‘den babası mezbûr el-Hâc Mehmed üzerine kadr-i ma‘rûf nafaka takdîr olunmak matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü me’âb sagīre-i merkūme için babası mezbûr el-Hâc Mehmed üzerine yevmî beş akçe nafaka takdîr edip vakt-i zarûretde istidâne ve sagīre-i merkūmeye sarfa ve lede’z-zafer mezbûr el-Hâc Mehmed’e rücû‘a izin verip mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek sene 1073.


Şuhûdü’l-hâl: Es-Sâbikūn.