|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 143 Hüküm no: 71 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Belkıs bt. Abdullah’ın cariyesi Macar asıllı Kalender bt. Abdullah’ı azat ettiği
Itâknâme Husûs-ı âti’l-beyânın mahallinde tahrîri iltimâs olunmağın, bu fakīr mahmiye-i İstanbul’da Ahur[kapı] kurbunda Kabasakal mahallesinde Belkıs bt. Abdullah nâm hâtunun sâkine olduğu menzile varıp zeyl-i kitâbda isimleri mastûr olan müslimîn huzûrunda akd-i meclis-i şer‘-i şerîf olundukda mûmâ-ileyhâ Belkıs Hâtun’un zâtı Mustafa Bey b. Mehmed ve Yusuf Bey b. Abdullah ta‘rîfleri ile mu‘arrefe oldukdan sonra, mûmâ-ileyhâ Belkıs Hâtun meclis-i ma‘kūd-ı mezbûrda ikrâr ve takrîr-i kelâm edip kendiye rıkkıyyetini mu‘terife olan işbu orta boylu, açık kaşlı, kara gözlü, Macariyyetü’l-asl bâ‘isetü hâze’l-kitâb Kalender bt. Abdullah nâm câriye-i memlûkesini hasbeten lillâhi’l-meliki’l-hallâk tahrîr ve i‘tâk ve silk-i harâir-i asliyyâta idrâc ve ilhâk eyledim ba‘de’l-yevm mezbûre Kalender sâir harâir-i asliyyât gibi hürre olup üzerinde velâdan gayrı hakkım kalmadı dedikde vâki‘ü’l-hâl bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Umdetü’l-müderrisîni’l-kirâm Hasan Efendi eş-şehîr bi Mollazâde, Zübdetü’l-müderrisîni’l-fihâm Abdülgaffâr Efendi b. Abdülkādir, Fahrü’l-müderrisîni’l-kirâm Ahmed Efendi b. Abdurrahman, Hasan Efendi el-İmâm, Mehmed Efendi b. Ahmed el-imâm bi’l-mahalleti’l-mezbûre, Fahrü erbâbi’t-tahrîr Receb Efendi b. Ramazan, el-Hâc Muharrem b. Hızır, Mehmed Çelebi b. Ali, Mustafa Bey b. Mehmed, Yusuf b. Abdullah.
|