|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 162 Hüküm no: 103 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dilaver b. Abdullah’ın Leh asıllı kölesi Receb b. Abdullah’ı azat etmesi gerektiği
İsbât-ı ıtk İşbu orta boylu, kara gözlü, kara kaşlı Lehiyyü’l-asl Receb b. Abdullah nâm gulâm meclis-i şer‘de Mevlânâ Dilaver b. Abdullah mahzarında üzerine da‘vâ edip mukaddemâ ben mezbûrun abd-i memlûkü olup târih-i kitâbdan üç sene mukaddem medîne-i Eyüb’de Yusuf Paşa bahçesinde beni i‘tâk eyledikden sonra ke’l-evvel rıkkolmak üzre bana vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr cevâbında zikr olunan gulâm abd-i memlûkü olduğunu ikrâr lâkin vech-i muharrer üzre merkūm Receb’i i‘tâkını inkâr eyledikde mezbûr Receb’den müdde‘âsı için beyyine taleb olundukda udûl-i müslimînden otuz dört cemâ‘at odasından odabaşı Abdi Beşe b. Hüseyin ve Ömer Çelebi b. Murad ve Mustafa Beşe b. Mehmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ mezbûr Dilaver târih-i mezbûrda zikr olunan bahçede abd-i memlûkü mezbûr Receb[i] huzûrumuzda malından âzâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mezbûr Dilaver’in müdde‘î-i merkūm Receb’den kasr-ı yedine tenbîh birle mâ vaka‘a bi’t-taleb ketb olundu. Fi[’l-yevmi’]s-sânî min Şevvâli’l-mükerrem sene 1073.
Şuhûdü’l-hâl: Mustafa Ağa b. Süleyman, Abdurrahman b. Hasan, Ahmed Beşe er-Râcil, Emrullah Beşe b. ( ), Mehmed b. Ramazan.
|