.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 245
Hüküm no: 233
Orijinal metin no: [20b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hâtun bt. Ali’nin el-Hâc Yusuf b. Abdullah’a olan borcunu ödeyerek rehinini geri aldığı

Bi’l-vekâle edâ-i deyn ve kezâlik kabz-ı rehin Mahmiye-i İstanbul’da Süleymaniye mahallesi sâkinlerinden el-Hâc Yusuf b. Abdullah tarafından husûs-ı âti’l-beyâna vekîl olup bimâ hüve nehcü’s-sübût vekâleti sâbite olan Mehmed Bey b. Osman nâm kimesne meclis-i şer‘-i hatîr-i lâzımü’t-tevkīrde Fâtıma Hâtun bt. Ali tarafından deyn-i âti’z-zikri edâya ve mukābelesinde vaz‘ olunan rehni ahz u kabza vekîl olup bi hasebi’ş-şer‘ vekâleti sâbite olan Mustafa Efendi b. İbrahim mahzarında ikrâr ve takrîr-i kelâm edip müvekkile-i mezbûre Fâtıma Hâtun on iki bin akçe deyn mukābelesinde müvekkilim mezbûr el-Hâc Yusuf’a alâ tarîki’r-rehn vaz‘ ve teslîm eylediği bir elmas hâtemi vekîl-i mezbûr Mustafa Efendi yedinden meblağ-ı merkūm on iki bin akçeyi bi’t-tamâm vekâletim hasebiyle alıp kabz eylediğimden sonra def‘ ve teslîm eyledim. Ol dahi bi’l-vekâle rehn-i mezbûru ahz ve tesellüm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Zi’l-kâ‘deti’l-harâm li sene selâse ve seb‘în ve elf.


Şuhûdü’l-hâl: Mustafa Efendi b. Mustafa, el-Hâc Ahmed Bey b. Mahmud, Hasan Efendi b. Receb, İbrahim Çelebi b. Halil, Halil Çelebi yağlıkçı, Pazara Giden Mustafa Beşe, el-Hâc İbrahim, Süleyman Efendi b. Mustafa.