İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 515 Hüküm no: 650 Orijinal metin no: [58a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine Hanım’ın hırsıza yataklık ettiği iddiasıyla Kıptiye Altın bt. Hüseyin aleyhine açtığı davada sulh olduğu Sulh Mahmiye-i İstanbul’da Yatağançeşme kurbunda sâkine Sâkine bt. ( ) nâm hâtun meclis-i şer‘de Kıbtiyân tâifesinden hâfızatü’l-kitâb Altın bt. Hüseyin nâm hâtun mahzarında tav‘an ikrâr ve i‘tirâf edip mukaddemâ gāibe ani’l-meclis Alem nâm hâtun bir Çinkârî atlas kaftanımı ve iki paşa dülbendimi ve bir dîbâ zıbınımı ve bir yeşil kadife serpûşumu alıp firâr eyledikden sonra sen yatağı olmağla sana teslîm eylemiş, hâlâ eşyâ-i merkūmemi ver deyû mezbûre Altın’dan da‘vâ eylediğimde mezbûre dahi inkâr etmekle beynimizde nizâ‘ vâki‘ olmağla da‘vâ-yı merkūmeden an inkâr mezbûr Altın ile yedi yüz akçe üzerine sulh olup ol dahi sulh-ı mezbûru kabûl eyledikden sonra bedel-i sulh olan yedi yüz akçeyi mezbûre Altın yedinden tamâmen alıp kabz edip husûs-ı mezbûra müte‘allika da‘vâdan mezbûre Altın’ın zimmetini ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharrem li sene 1074. Şuhûdü’l-hâl: Es-Sâbikūn.