İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 516 Hüküm no: 652 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hüseyin’in boşandığı kocası Mustafa b. Resûl’den mehir ve nafakasını aldığı Kabz-ı mehr Mahmiye-i İstanbul’da Tercüman Yunus mahallesinde sâkine Ayşe bt. Hüseyin nâm hâtun meclis-i şer‘de işbu bâ‘isü’l-kitâb zevc-i mutallıkı Mustafa b. Resûl nâm kimesne mahzarında bi tav‘ihâ ikrâr ve takrîr-i kelâm edip mezbûr Mustafa beni talâk-ı bâyin ile tatlîk etmeğin zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem ve me’ûnet-i süknâm için ta‘yîn olunan üç yüz akçe ki cem‘an bin üç yüz akçeyi merkūm Mustafa yedinden tamâmen ahz u kabz eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: Şükrullah b. Mustafa, Hüseyin b. Ebûbekir, Mustafa b. İsâ, Hüseyin b. Receb, Ali b. Hacı Bayram, Resûl b. Rıdvan, Mehmed b. Ramazan.