İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 523 Hüküm no: 664 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Mehmed’in vârislerinden Sâime’nin miras hususunda Emine bt. Mehmed’in zimmetini ibrâ ettiği İbrâ Dergâh-ı âlî yeniçerilerinin on üçüncü ağa bölüğü odası ahâlîsinden olup mukaddemâ vefât eden Osman Beşe b. Mehmed nâm râcilin verâseti, zevce-i metrûkesi Emine bt. Mehmed nâm hâtun ile müteveffâ-yı mezbûrun babası mezbûr Çanlı Mehmed’in li ebeveyn kız karındaşı Ayşe Hâtun’un sadriyye kızı Sâime bt. Süleyman nâm hâtuna münhasıra oldukdan sonra mezbûre Sâime Hâtun tarafından husûs-ı âtîye vekîl olup zâtını ma‘rifet-i şer‘iyye ile ârifân mahmiye-i İstanbul’da Silivrikapısı kurbunda sâkin Ahmed Çelebi b. Eyüb ve Hasan Çelebi b. Kasım nâm kimesneler şehâdetleri ile vekâleti sâbite olan sadrî oğlu Ahmed Bey meclis-i şer‘de müteveffâ-yı mezbûrun terekesine vâzı‘atü’l-yed olan mezbûre Emine Hâtun mahzarında bi’l-vekâle ikrâr edip vâlidem ve müvekkilem mezbûre Sâime Hâtun’un mûrisi mezbûr Osman Beşe fevt oldukda akār ve menkūl cümle terekesi zevcesi mezbûre Emine Hâtun kabz etmiş idi el-hâletü hâzihî mezkûre Emine Hâtun ile tehârüc-i şer‘î tarîki üzre bi’l-vekâle elli esedî guruşa sulh olup mezbûre dahi ba‘de’l-kabûl bedel-i sulh olan elli esedî guruşu mezbûre Emine Hâtun yedinden alıp kabz edip tereke-i zâhire-i müteveffâ-yı mezbûra müte‘allika da‘vâdan merkūme Emine Hâtun’un zimmetini ibrâ eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: Oda-i mezbûre odabaşısı İsâ Beşe b. Muharrem, Mehmed Beşe b. Cafer odabaşı-i sâbık, Abdurrahman Çelebi b. Mustafa el-Cündî Mustafa Beşe b. Osman, Ahmed Beşe b. Mehmed, Mehmed Beşe b. İbrahim, Himmet Beşe, Şükrullah Çelebi b. Mustafa.