İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 530 Hüküm no: 676 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Mustafa’nın Rus cariyesi Timurhan’ı azat ettiği Itâknâme Mahmiye-i İstanbul’da Cafer Subaşı mahallesi sâkinelerinden Râbia bt. Mustafa nâm hâtun tarafından i‘tâk-ı âtîye vekîl olup mezbûrenin zâtını ma‘rifet-i şer‘iyye ile ârifân Mehmed Çelebi b. Mehmed ve Sâlih Çelebi b. Mehmed nâm kimesne şehâdetleri ile şer‘an vekâleti sâbite olan zevci Mehmed Çelebi b. Kasım meclis-i şer‘-i şerîf-i vâcibü’t-teşrîfde bi’l-vekâle ikrâr ve takrîr-i kelâm edip müvekkilem mezbûre Râbia kendiye rıkkını mu‘terife orta boylu açık kaşlı gök elâ gözlü Rusiyyetü’l-asl Timurhan bt. Abdullah nâm câriye-i memlûkesini hasbeten lillâhi’l-azîm ve taleben li merzâti Rabbihi’l-kerîm tahrîr ve i‘tâk ve silk-i harâir-i asliyyâta idrâc ü ilhâk eyledim, üzerinde velâdan gayrı hakkım kalmadı dedi dedikde mâ vaka‘a gıbbe’t-taleb ketb olundu. Fi’l-yevmi’r-râbi‘ min Saferi’l-hayr li sene erba‘a ve seb‘în ve elf. Şuhûdü’l-hâl: Keşfî Mustafa Efendi, Abdi Çelebi b. Hüseyin, Mustafa Çelebi b. Hüseyin, Mehmed b. Ramazan, Baba Resûl b. Rıdvan.