İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 697 Hüküm no: 938 Orijinal metin no: [89b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Bey b. Mehmed Paşa ve kardeşi Mustafa Bey’in müşterek arsalarını Ali Efendi b. Ahmed Efendi’ye sattıkları Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da el-Hâc Hasan mahallesinde sâbıkan Belgrad kadısı olan umdetü’l-mevâliyyü’l-kirâm Ali Efendi b. Ahmed Efendi’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mahmiye-i mezbûrda Yenikapı dâhilinde Melek Hâtun mahallesi sükkânından umdetü’l-emâcid ve’l-ekârim Süleyman Bey b. el-merhûm Mehmed Paşa tarafından husûs-ı âti’l-beyânı ikrâra vekîl olup Mehmed Efendi b. Kemaleddin el-imâm ve Mustafa Çelebi b. Hasan şehâdetleri ile şer‘an vekâleti sâbite olan Mehmed Efendi b. İsmail ile müvekkil-i mezbûrun li ebeveyn karındaşı umdetü’l-emâcid ve’l-a‘yân Mustafa Bey tarafından husûs-ı âti’l-beyânı ikrâra vekîl olup şâhidân-ı mezbûrân şehâdetleri ile şer‘an vekâleti sâbite olan el-Hâc Ahmed b. el-Hâc Bayram nâm kimesneler meclis-i ma‘kūd-ı mezbûrda, işbu kitâb-ı sıhhat-nisâbın mâliki mûmâ-ileyh Ali Efendi mahzarında vekâletleri hasebiyle her biri ikrâr ve takrîr-i kelâm edip müvekkillerimiz müşârün-ileyhimânın mahmiye-i mezbûrede Firûz Ağa mahallesinde vâki‘ iki tarafı merhûm Abdülbâkī Paşa vakfı ve bir tarafı Medîne-i Münevvere -alâ münevverihâ efdalü’s-salât ve ekmelü’t-tahiyye- vakfı ve bir tarafı tarîk-i hâssa müntehî bir su kuyusunu müştemil olup tûlen yirmi sekiz zirâ‘ ve arzen on altı zirâ‘ bi hesâb-ı şatrancî dört yüz kırk sekiz zirâ‘ mülk-i mevrûsları olan muhterik menzil arsasını, üzerinde olan enkāzı ile bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Ali Efendi’ye yirmi bin nakid ve râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm mûmâ-ileyh Ali Efendi dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi bin akçeyi vekâletlerimiz hasebiyle müşterî-i mûmâ-ileyh Ali Efendi yedinden tamâmen ahz u kabz eyledik ba‘de’l-yevm zikr olunan muhterik menzil arsası mûmâ-ileyh Ali Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde gıbbe’t-tesâdukı’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Abdullah Çelebi ve Muhzır Mevlüd ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ gıbbe’t-taleb ketb olundu. Hurrire fî târihi’l-mezbûr li’s-seneti’l-mezbûre. Şuhûdü’l-hâl: Ömer Efendi b. Abdullah, Mehmed Ağa b. Ramazan, Muslu Çelebi b. Yusuf, es-Seyyid Mehmed Efendi b. Mahmud Çelebi, el-Hâc Mahmud b. Mehmed, Ali Çelebi b. Haydar ve gayruhüm.