İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 713 Hüküm no: 957 Orijinal metin no: [92b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Veli’nin vârislerinin muhallefatı almak üzre Kuşadalı es-Seyyid Mustafa Çelebi’ye vekâlet verdikleri Mahmiye-i İstanbul’da Cafer Ağa mahallesi sükkânından olup Kuşadası’nda ticâret üzre iken bundan akdem vefât eden Ali Çelebi b. Veli nâm kimesnenin verâseti, zevce-i metrûkesi Fâtıma bt. Hüseyin Bey ile li ebeveyn karındaşı Ömer Çelebi’ye münhasıra olduğu şer‘an zâhir ve müte‘ayyin oldukdan sonra mezbûrân Ömer Çelebi ve Fâtıma Hâtun meclis-i şer‘-i hatîr-i lâzımü’t-tevkīrde her biri takrîr-i kelâm edip cezîre-i mezbûre sâkinlerinden zıhgirci es-Seyyid Mustafa Çelebi nâm kimesneyi mûrisimiz müteveffâ-yı mezbûrun muhallefâtına vaz‘-ı yed eden kimesnelerden da‘vâ ve taleb ve ahz u kabza ve bize îsâle ve ahz u kabz ve îsâl mütevakkıf olduğu umûrun cümlesine vekâlet-i mevkūfe ile mezbûr es-Seyyid Mustafa Çelebi’yi vekîl ve menâbımıza nâib nasb ve ta‘yîn eyledik dediklerinde, mâ vaka‘a bi’t-taleb ketb olundu. Şuhûdü’l-hâl: Ahmed b. Mehmed, Mustafa Çelebi b. Ali, Veli Çelebi b. Mahmud, Abdi Çelebi b. Hüseyin ve gayruhüm.