İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 763 Hüküm no: 1031 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Girit’de ölen Ömer b. Musa’nın Hasan Beşe’ye emanet bıraktığı eşyasının mirasçısı Hasan Çavuş tarafından teslim alındığı Bundan akdem cezîre-i Girid’de fevt olan Ömer b. Musa’nın hasren vârisi ammisi Hasan Çavuş tarafından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan mezbûr Hasan Çavuş’un zevcesi Ayşe bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hasan Beşe b. Abdullah mahzarında ikrâr ve takrîr-i kelâm edip müvekkilimin mevrûsu müteveffâ-yı mezbûr Ömer cezîre-i mezbûreye gitmezden mukaddem eşyâ-i memlûkesinden bir mâî yelek ve bir kırmızı kontoş ve bir mor dolama ve bir beyaz zıbın ve bir mavi zıbın ve bir şirâyi zıbın ve bir yeşil zıbın ve iki beyaz makdem ve bir kırmızı çakşır ve iki çintiyân ve bir abdest makramasını mezbûr Hasan Beşe’ye emânet vaz‘ ve teslîm eylemişdie eşyâ-i mezkûreyi zevcim müvekkil-i mezbûr Hasan Çavuş için vekâletim hasebiyle mezbûr Hasan Beşe yedinden ahz u kabz eyledim eşyâ-i mezbûreden mezbûr Hasan Beşe yedinde bir şey kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Çelebi b. Mahmud, Abdullah Çelebi b. Hasan, Resûl b. Rıdvan, Veli b. Mahmud ve gayruhüm.