İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 817 Hüküm no: 1112 Orijinal metin no: [114b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ehlisünnet ve cemâat olan Müezzin Mehmed b. Bâli’den, babasının adı defterde olsa da Çingene Cizyesi talep edilemeyeceği Mahmiye-i İstanbul hısnı ebvâbından Ebâ Eyyûb-i Ensârî kapısı dâhilinde Mustafa Paşa mahallesi sükkânından olup zikr olunan Mustafa Paşa câmi‘-i şerîfi’nde müezzin olan işbu hâmilü hâze’l-kitâb el-Hâc Mehmed b. Bâli nâm kimesne meclis-i şer‘-i hatîrde takrîr-i kelâm ve bast-ı merâm edip ben müslim ve ehl-i sünnet ve cemâ‘atinden olmağla mahalle-i müslimînde sâkin olup ba‘de’t-te’zîn evkāt-ı hamseyi cemâ‘at ile edâ ve savm ve sâir ferâizi mahallinde edâ edip ve ehl ü ıyâlimi nâ-mahrem olan eşhâsdan ber mûceb-i şer‘-i kavîm kaçırıp ve tavâf-ı Beyt-i-harâm ve ziyâret-i Ravza-i mutahhara eylemişken, çingene cizyesi cem‘ine me’mûr olanlar mücerred senin baban Bâli çingene idi ismi defterde mastûr ve mukayyeddir ol vechile niçin cizyeni vermezsin diye beni rencîdeden hâlî değillerdir, yedimde olan fetvâ-yı şerîfeye nazar edip sâkin olduğum mahalle-i mezbûre ahâlîsi olan mahalle-i mezbûre imâmı el-Hâc Mustafa Efendi b. Hamîd ve Hızır Çavuş imâmı Mehmed Efendi ve Mustafa Çelebi b. Mehmed ve el-Hâc Mustafa b. Ali ve Mahmud Halîfe b. Yusuf ve Musa Beşe b. İbrahim ve İsmail Efendi b. Mehmed ve el-Hâc Mustafa b. Pîr Ahmed ve Ahmed Efendi b. Abdülkerim el-imâm nâm kimesnelerden a‘mâl ve ef‘âli ba‘de’l-istihbâri’ş-şer‘î tahrîr ve ba‘dehû sûreti verilmek matlûbumdur, deyû şeyh-i meşâyihu’l-İslâm müfti’l-enâm olan sultânü’l-ulemâ’i’l-izâm burhânü’l-fuzalâ’i’l-fihâm izzetlü ve sa‘âdetlü Yahya Efendi hazretlerinin ünvânları ile mu‘anven fetvâ-i şerîfe ibrâz edip nazar olundukda “çingene tâifesinden Zeyd, Müslim ve ehl-i sünnet ve cemâ‘atinden olmağla mahalle-i müslimînde sâkin olup evkāt-ı hamseyi cemâ‘at ile edâ ve savm ve sâir ferâizi mahallinde edâ ederken çingene cizyesi cem‘ine me’mûr olanlar Zeyd’den mücerred ismin defterdedir deyû cizye taleb edip almağa şer‘an kādir olurlar mı deyû istiftâ olundukda cevâb-ı bâ savâbında olmazlar” deyû buyurmağın, ınde’l-istihbâri’ş-şer‘î fi’l-vâki‘ mezkûr el-Hâc Mehmed Müslim ve ehl-i sünnet ve cemâ‘atden ve mahalle-i mezbûrede sâkin olup evkāt-ı hamseyi cemâ‘at ile edâ ve savm ve sâir ferâizi mahallinde edâ edip ve ehl ü ıyâlini nâ-mahrem olan eşhâsdan ber mûceb-i şer‘-i kavîm kaçırıp ve tavâf-ı Beyt-i-harâm ve ziyâret-i Ravza-i mutahhara eylemiş sâlih ve mütedeyyin olup çingene tâifesinin ef‘âl ve a‘mâlinden bir fi‘l ve bir amel mezkûr el-Hâc Mehmed’de olmayıp ehl-i sünnet ve cemâ‘at ef‘âli ve a‘mâli ile mukayyed olduğuna her biri alâ tarîki’ş-şehâde haber vermeğin, mâ vaka‘a mezkûr el-Hâc Mehmed talebiyle ketb olundu. Fi’l-yevmi’s-sâlis min Cemâziyelevvel sene 1074. Şuhûdü’l-hâl: Abdi Çelebi b. Hüseyin, Şükrullah Bey b. Hüseyin, Baba Resûl b. Rıdvan, Mehmed b. Ramazan, Veli Çelebi b. Yusuf.